Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 604 Hüküm no: 951 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hasan’ın davasının reddi Ma‘rûz; Medîne-i Üsküdar’da Hacce Hatun mahallesinde sâkin Mustafa b. Hasan meclis-i şer‘-i hatîrde ber-vech-i âtî münâza‘un-fîh olan vakıf menzilin mütevellîsi tarafından vekîl-i müsecceli câbî-i vakf Hafız Abdullah Efendi hâzır olduğu hâlde menzil-i mezkûra vaz‘-ı yedi mütehakkık olan üvey kızı mu‘arrefetü’z-zât Emine bt. Mehmed nâm hatun mahzarında târih-i i‘lâm[dan] iki sene mukaddem mahalle-i mezbûrede vâki‘ Kahvecibaşı Vakfı musakkafâtından ma‘lûmü’l-hudûd ve’l-müştemilât bir bâb menzilimi mezbûre Emine’ye altmış guruş bedel-i makbûz mukābelesinde ve bâ-ma‘rif-i mütevellî ferâgat edip lâkin ben ferâğıma nâdim olmamla menzil-i mezkûru hâlâ taleb ederim deyü eylediği da‘vâsı mesmû‘a olmadığı bi’l-iltimâs huzûr-ı âlîlerine i‘lâm olundu. Fî 23 min-Ra sene 1206