Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 606 Hüküm no: 954 Orijinal metin no: [77b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed Emin’in kayınvalidesinden alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Kefçe mahallesinde sâkin Ahmed b. Mehmed Emin nâm kimesne medîne-i mezbûrede mahfil-i bâbda meclis-i şer‘-i hatîrde hâlâ kayınvâlidesi mu‘arrefetü’z-zât Zeliha bt. Osman nâm hatun mahzarında mezbûre Zeliha Hatun târih-i i‘lâmdan iki sene mukaddem kebîr oğlu gāib ani’l-meclis Ahmed nâm kimesne içün yedimden iştirâ ve kabz eylediği bir yatağan bıçağı semeninden otuz guruş ve bir Ahmediye ta‘bîr olunur tülbent çarşaf semeninden on guruş ve yedimden istidâne ve kabz ve umûruna sarfla istihlâk eylediği yirmi beş guruş ve bir def‘a yirmi iki guruş ve bi-şarti’r-rücû‘ emriyle oğlu mezbûr Ahmed’e âhardan iştirâ eylediğim ma‘lûmü’l-aded güvercin semeninden yirmi beş guruş ve yine emriyle âhar oğlu Mehmed Emin’e teslîm eylediğim nakden on beş guruş ile kendiye def‘ u teslîm eylediğim üç Şam alacası entari semeninden yirmi beş guruş ve iki kavuk semeninden dokuz guruş ve bir çift mest pabuç ve tönbâki semeninden beş guruş ve yine mezbûre Zeliha Hatun’un fuzûlî ahz ü kabz eylediği kızım sagīre Hadice’nin başına tezyîn içün vaz‘ eylediğim nısfiye ve rub‘iye kıymetlerinden beş buçuk guruş ile emlâkimden âhara bey‘ eylediği yirmi değirmi yemeni semeninden yirmi guruş ve yine tüfenk semeninden on guruş ve eğer takımı semeninden on guruş ki cihât-ı mezkûreden cem‘an iki yüz yirmi bir buçuk guruş zimmetinde alacak hakkım olmağla hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyân ve isbâta kādir olamayıp talebiyle mezbûre Zeliha Hatun gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda mezbûre Zeliha Hatun’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 16 min-Ra sene 1206