Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 606 Hüküm no: 955 Orijinal metin no: [77b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası seferde iken başka biriyle evlenen Hatice Hanım’ın boşanarak önceki kocasıyla tekrar nikâhlanması Ma‘rûz; Medîne-i Üsküdar’da [Vâlide-i] Atik mahallesinde sâkin Ali b. Ali medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Hadice bt. İsmail mahzarında hâlâ zevci Hasan b. Mustafa hâzır olduğu halde mezbûre Hadice Hatun yirmi beş guruş mehr-i müeccel tesmiyesiyle benim zevce-i medhûlün-bihâm iken ben târih-i i‘lâmdan üç ay mukaddem sefer-i hümâyûnda bulunmağla zevcem bana bir kıt‘a talâk mektûbu tahrîr etmekle benim içün ben zevcim Ali’den mutallakayım deyü hilâf-ı vâki‘ bir kıt‘a mektûb-ı müzevver ile yine yirmi beş guruş mehir tesmiyesiyle hâzır-ı mezbûr Hasan’a nefsini tezvîc etmekle suâl olunup beynlerinde olan nikâhları fesh birle hâlâ zevcem mezbûre Hadice’den keff-i yed ve bana teslîme tenbîh olunmak matlûbumdur deyü da‘vâ eyledikde ol dahi cevâbında nefsini ber-vech-i muharrer hâzır-ı mezbûr Hasan’a tezvîcini ve mezbûr Hasan dahi mezbûre Hatice’nin zevci olduğunu bilmediğini ikrâr ü i‘tirâf etmeleriyle mûcebiyle mezbûre Hadice ile hâzır-ı mezbûr Hasan’ın beynlerinde olan nikâhlarını feshle ba‘de’l-hükm hâzır-ı mezbûr Hasan mehr-i mezkûr yirmi beş guruşu mezbûre Hadice’ye def‘ ü teslîm eyledikde ol dahi yedinden tamamen ahz ü kabz edip ba‘de-inkızâ’i’l-idde mezbûre Hadice zevc-i evveli müdde‘î-i mezbûr Ali’ye temkîn ve mutâva‘at ve mu‘âmele-i zevciyet eylemeğe tenbîh olunduğu bi’l-iltimâs huzûr-ı âlîlerine i‘lâm [olundu.] Fî 2 min-Ra sene 1206