Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 607 Hüküm no: 956 Orijinal metin no: [77b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ali’nin kendisinden muhâlaa yoluyla boşanan eşinin mehrini ödemesi Ma‘rûz; Medîne-i Üsküdar’da Debbâğlar mahallesinde sâkine mu‘arrefetü’z-zât Selime bt. Salih nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı Osman. b. Ali mahzarında ben mezbûr Osman’ın yirmi beş guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan beş sene mukaddem beni tatlîk etmekle mehr-i mezkûrumu hâlâ taleb ederim deyü ba‘de’d-da‘vâ ve’l-istintâk mezbûr Osman cevâbında fi’l-hakīka müdde‘iye-i mezbûre mukaddemâ ber-vech-i muharrer zevcesi olduğunu ikrâr lâkin târih-i merkūmda müdde‘iye-i merkūme mehr-i müeccel-i mezkûresinden fâriğa olup benim ile muhâla‘a-i sahîha-i şer‘iye ile hul‘ olup hukūk-ı zevciyete müte‘allika âmme-i de‘âvîden dahi zimmetimi ibrâ ve ıskāt etmiş idi deyü eylediği def‘ini isbâta kādir olamayıp talebiyle müdde‘iye-i mezbûre gıbbe’t-tahlîfi’ş-şer‘î mûcebiyle meblağ-ı mehr-i mezkûr yirmi beş guruşu müdde‘iye-i mezbûreye edâya zevc-i sâbıkı mezbûr Osman’a tenbîh olunduğu bi’l-iltimâs huzûr-ı âlîlerine i‘lâm olundu. Fî 23 min-Ra sene 1206