Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 610 Hüküm no: 963 Orijinal metin no: [78a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Mehmed’e tacizde bulunan Bostancı Mahmud ve Bostancı Ahmed’in ikaz edildiği Ma‘rûz; Medîne-i Üsküdar’da Pazarbaşı mahallesi sükkânından sâhib-i arzuhâl Ömer b. Mehmed nâm kimesne medîne-i mezbûrede mahfil-i bâbda meclis-i şer‘-i hatîrde derûn-ı arzuhâlde isimleri mezkûr Bostanî Mahmud b. Veli ve Bostanî Ahmed b. Osman nâm kimesneler muvâcehelerinde bundan akdem Üsküdar ustası ağa mezbûrân Mehmed [Mahmud] ve Ahmed’i bir töhmet ile ithâm ve habsedip mezbûrân dahi bizi zâbite sen gamz ettin deyü târih-i i‘lâmdan sekiz gün mukaddem mahalle-i mezbûrede vâki‘ menzilim kapısı önüne gelip bi-gayrı hakkın bana elfâz-ı kabîha ile şetm etmeleriyle mûcib-i şer‘îsini mezbûrândan taleb ederim deyü eylediği da‘vâsından bâ-tavassut-ı muslihîn meccânen fâriğ olup husûs-ı mezkûr[a] müte‘allika âmme-i de‘âvîden mezbûrân Mahmud ve Ahmed’in zimmetlerini ibrâ ve ıskāt eylediğinde onlar dahi ibrâsını kabûl ve fî-mâ ba‘d bir daha müdde‘î-i mezbûr Ömer’e ta‘arruz ve müdâhale etmemek üzere mezbûrân Mahmud ve Ahmed’den her biri ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 25 min-Ra sene 1206