Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 612 Hüküm no: 965 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in borcunu ödemesi Ma‘rûz; Mahmiye-i İslâmbol’da Uzunçarşı’da sâkin İbrahim b. Mehmed medîne-i Üsküdar’da meclis-i şer‘-i hatîrde Mehmed b. İbrahim nâm kimesne mahzarında mezbûr Mehmed târih-i i‘lâmdan bir sene mukaddem cihet-i karz-ı şer‘îden iki guruş ile yedimden iştirâ ve kabz eylediği beher keyli üçer guruşa olmak üzere beş keyl hınta semeninden on beş guruş ki cem‘an on yedi guruş hakkımı taleb ederim deyü da‘vâ mezbûr Mehmed cevâbında cihet-i karzdan iki guruş ve yüzer paradan beş keyl hınta semeninden on iki buçuk guruş ki cem‘an müdde‘î-i mezbûra on dört buçuk guruş deyni olduğunu ikrâr ziyâde yüz parayı ba‘de’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp tâlib-i tahlîf dahi olmamağla mûcebiyle mukırr u mu‘terif olduğu on dört buçuk guruşun müdde‘î-i mezbûra edâsıyla mezbûr Mehmed ilzâm olunduğu bi’l-iltimâs huzûr-ı âlîlerine i‘lâm olundu. Fî-selh-i Ra sene 1206