Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 617 Hüküm no: 977 Orijinal metin no: [79a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Aleksi ile boşandığı karısının birbirileri hakkındaki iddialarından vazgeçtikleri Ma‘rûz; Medîne-i Üsküdar’da Ayazma mahallesinde mütemekkin Berber Aleks v. Ligori nâm zimmî meclis-i şer‘-i hatîrde zevce-i mutallakası mu‘arrefetü’ş-şahs Mariya bt. Dimo Nasrâniye muvâcehesinde bundan akdem merkūm Aleks zimmî zevce-i mutallakası merkūme Mariya’dan mecmû‘-ı kıymetleri yüz yetmiş dört guruşa bâliğ eşyâ-i memlûkemden bir çift altun bilezik ve bir sim kuşak ve bir çift zümrüt küpe ve iki altun yüzük ve bir kazgan ve bir leğen ma‘a ibrik ve iki sagīr minder ve iki döşek ve dört beledî yasdık ve üç yemeni yorgan ve beş tencere ve dört sahan ve dört lenger ve bir sîm menzilinde kalmağla taleb ederim deyü eylediği da‘vâsından merkūme Mariya Nasrâniye dahi zevc-i sâbıkı içün beni darb etmiş idi deyü eylediği da‘vâsından her biri bâ-tavassut-ı muslihîn meccânen fâriğler olup husûs-ı mezkûrlara ve âmmeye müte‘allika de‘âvîden her biri âharın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-Ra sene 1206