Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 617 Hüküm no: 978 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostanti v. Rali’nin mirasının taksiminde çıkan ihtilafın giderilmesi Ma‘rûz; Medîne-i Üsküdar’a tâbi‘ Kādı karyesinde mütemekkin iken bundan akdem hâlik olan Kostanti v. Rali nâm zimmînin verâseti zevce-i metrûkesi Palaşa bt. Londari nâm Nasrâniye ile anası Zoyiçe bt. Kostanti ve sulbî sagīr oğulları Nikola ve Alenko ve Yani ve Yorgi’ye münhasıra ve tashîh meselesi doksan altı sehm i‘tibârıyla on iki sehmi zevcesi mezbûreye ve on altı sehmi anası merkūmeye ve on yedişer sehmden yetmiş iki sehmi oğulları merkūmûna isâbeti tahakkukundan sonra şahsı mu‘arrefe zevce-i merkūme Palaşa Nasrâniye medîne-i Üsküdar’da meclis-i şer‘-i hatîrde kezâlik şahsı mu‘arrefe ümm-i mersûme Zoyiçe Nasrâniye muvâcehesinde karye-i mezbûre hâricinde Modaburnu nâm mahâlde bir ocak ve yine medîne-i mezbûreye muzâfe Beykoz kasabası önünde iki ocak ki cem‘an üç ocak mülk kılıç dalyanlarının kırk sehm i‘tibârıyla on sekiz sehm-i şâyi‘i zevcim hâlik-i merkūmun ile’l-helâk yedinde mülkü ve ba‘de-helâkihî tashîh-i mezkûr üzere bize mevrûs olmağla yine kıbel-i şer‘den sıgār-ı merkūmenin bâ-hüccet-i şer‘iye vasîleri olduğuma binâen zikr olunan dalyanların menâfi‘i ve sâir mâl-ı mevrûsları ile sıgār-ı merkūmeyi infâk üzere iken benim gıyâbımda mârrü’z-zikr on sekiz sehm hisse-i şâyi‘anın dokuz sehm-i şayi‘ini gāib ani’l-meclis Mihalaki nâm zimmî hîlekâr ve müzevvir olmağla bir takrîb Galata Mahkemesi’nde zevcim hâlik-i merkūmdan mukaddem mâliki Fokani nâm zimmî üzerinden benim üzerime bi’l-vekâle şirâ tarîkiyle hüccet etdirip lâkin zikr olunan dokuz sehm hisse-i şâyi‘a benim şirâen mülküm olmayıp hüccet-i mezkûre dahi hilâf-ı vâki‘ olmağla ancak zikr olunan dalyanlarda on sekiz sehm hisse-i şâyi‘adan tashîh-i mezkûr üzere bana isâbet eden hisse-i irsiyemden mâ‘adâ kat‘a alâka ve medhalim kalmayıp hüccet-i mezkûre ile amel ve i‘tibâr olunmasın deyü zevce-i mersûme Palaşa Nasrâniye’nin takrîr-i meşrûhunu ümm-i mersûme Zoyiçe Nasrâniye tasdîk eylediği bi’l-iltimâs huzûr-ı âlîlerine i‘lâm olundu. Fî 28 min-Ra sene 1206