Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 618 Hüküm no: 979 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzguncuk köyündeki Rum bakkalların aldıkları komisyon hakkında çıkan ihtilafın giderilmesi Ma‘rûz; Medîne-i Üsküdar’a tâbi‘ Kuzguncuk karyesinde Rum bakkāllarından Yani v. Dimitri ve diğer Yani v. Tanaş ve diğer Yani v. Tarandafil nâm zimmîler medîne-i mezbûrede meclis-i şer‘-i hatîrde karye-i mezbûrede ekmekci Simaven v. Kazer nâm zimmî ile terâfu‘larında medîne-i mezbûrede ekmekci ustaları fırınlarına merbût olan iskemle ta‘bîr olunur bakkāl ve uncu ve kebâbcı ve helvacı ve sâire mu‘ayyen olan mahallelerde bey‘ etdirdikleri nân-ı azîzden yirmi akçede bir akçe ücret verir iken biz dükkânlarımızda bey‘ eylediğimiz nân-ı azîzden merkūm Simaven ancak haftada her birimize birer guruş ücret verip lâkin bundan akdem bakkāl tâifesi ile beynlerinde nizâ‘ vâki‘ olmağla yirmi akçede bir akçeye râzılar olup kanâ‘at etmişler iken merkūm Simaven yine muhâlefet edip birer guruşdan ziyâde ücret vermemekle fî-mâ ba‘d dükkânlarımızda bey‘ eylediğimiz nân-ı azîzden yirmi akçede bir akçe ücreti versin yâhûd mahâll-i âhardan dükkânlarımıza nân-ı azîz getirip bey‘ ederiz deyü teşekkî ve merkūm Simaven cevâbında ez-kadîm karye-i mezbûrede mu‘ayyen iskemle ve ondalık ücreti olmayıp bakkāl tâifesinin talebiyle Rum bakkāllarına birer guruş ve Yahûd bakkāllarına otuzar para ücret verilegelmişdir deyü beynlerinde ihtilâf vâki‘ olmağla mahmiye-i İslâmbol’da habbâzân esnâfının kethudâları Süleyman Ağa ve yiğitbaşıları Molla Mehmed ve Salcı Molla Hüseyin ve mahmiye-i mezbûre ve medîne-i Ebâ Eyyûb el-Ensârî ve Galata ve medîne-i Üsküdar’da bi’l-cümle habbâzân ustalarından es-Seyyid el-Hâc Kasım Ağa ve es-Seyyid Ömer Ağa ve Molla Kemaleddin ve Eyüb Ağa ve Küçük Ali Usta ve Süleyman Usta ve Feyzullah Usta ve Bekir Usta ve Bayram Usta ve Ahram v. Mercan ve Melkon v. Mikâil ve Kavakil v. Nikagos ve Kirkor v. Kazer ve Kigork v. Kasbar ve Kirkor v. Haçador ve Kirkor v. Bedros ve Anan v. Minkasar? ve Kazer v. Kiragos ve Serkiz v. Agob ve sâir ihtiyâr ustaları meclis-i şer‘a hâzırûn olup karye-i mezbûre ve Âsitâne-i aliyye civârında olan karyelerde habbâzân ve iskemle ashâbının nizâm-ı kadîmleri suâl olundukda Boğaziçi’nde Rumeli cânibi ve Anadolu cânibinde zikr olunan Kuzguncuk karyesinden İstarvos ve Beylerbeyi ve Çenger karyesi, Anadolukavak Hisârı’na varınca kurâlarda olan fırın ashâbının Âsitâne-i aliyye’den zehâir naklinde ziyâde masrafları olduğundan gayri kurâ ahâlisi içün fırından nân-ı azîz almak ve fırın ashâbının hizmetkârı herkesin menzillerine nân-ı azîz getirmek mümkün olmağla iskemleye ihtiyâc-ı küllîleri olmayıp mücerred bu makūle iskemle ashâbının kisblerine medâr olmak içün ade[d] ve mikdârlarına göre haftada kemâ-fi’s-sâbık kırkar para ücret verilip ve âhar mahâlden nân-ı azîz nakli dahi bâ-emr-i âlî memnû‘âtdandır deyü nizâm-ı kadîmlerini ihbâr ve bakkāl tâifesi dahi Üsküdar’dan Anadolukavak Hisârı’na varınca iskemle ashâbı dükkânlarında bey‘ eyledikleri nân-ı azîzden haftada kırkar paradan ziyâde ücret ve ondalık talebiyle fırın ashâbına cevr ü ezâ etmeyip ve fırın ashâbı dahi ücret-i mezkûreyi vermede muhâlefet etmemek üzere işbu nizâm-ı kadîm ilâ-mâşâallâhi te‘âlâ düstûrü’l-amel tutulmak içün Başmuhâsebe’ye kayd ve yedlerine müceddeden tuğrâ-yı garrâ ile mu‘anven bir kıt‘a emr-i âlî-şân sudûrunu esnâf-ı mezkûreden her biri istid‘â eyledikleri bi’l-iltimâs huzûr-ı âlîlerine i‘lâm olundu. Fî 5 min-Zilhicce sene 1205