Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 619 Hüküm no: 980 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Ağya’nın Abraham v. Bedros’dan iddia ettiği alacak davasını ispatlayamadığı Ma‘rûz; Mahmiye-i İslâmbol hısnı ebvâbından Çatladıkapı’da mütemekkin iken bundan akdem hâlik olan Keresteci Kirkor v. Armağan nâm zimmînin verâseti zevcesi Maryem bt. ( ) nâm Nasrâniye ile sulbiye kebîre kızları Evi ve Saltana Nasrâniyelere ve li-ebeveyn er karındaşı oğlu Serkiz v. Ağya nâm zimmîye münhasıra ve tashîh meselesi bi-hükmi’l-ferâiz yirmi dört sehm i‘tibârıyla üç sehmi zevcesi merkūmeye ve sekizer sehmden on altı sehmi kızları merkūmetâna ve bâkī beş sehmi merkūm Serkiz’e isâbeti tahakkukundan sonra merkūm Serkiz zimmî medîne-i Üsküdar’da mahfil-i bâbda meclis-i şer‘-i hatîrde Abraham v. Bedros nâm zimmî muvâcehesinde bundan akdem Abraham zimmî mûrisim hâlik Kirkor merkūm yedinden iştirâ ve kabz eylediği ecnâs-ı kereste semeninden yetmiş beş buçuk guruşun yirmi guruşunu helâkinden mukaddem merkūm Abraham yedinden ahz ve elli beş buçuk guruşu zimmetinde bâkī kalıp kable’l-ahz ve’l-istifâ hâlik olmağla meblağ-ı bâkī-i merkūm elli beş buçuk guruşdan hisse-i irsiyeme isâbet eden on bir guruş yirmi üç para hakkımı merkūm Abraham zimmîden bi’l-verâse taleb ederim deyü da‘vâ ve mezbûr Abraham cevâbında müdde‘î-i merkūmun verâsetini ikrâr lâkin deyn-i merkūmu inkâr etmeğin müdde‘î-i merkūm Serkiz zimmî ber-vech-i muharrer müdde‘âsını beyândan izhâr-ı acz birle istihlâf etmeğin merkūm Abraham zimmî gıbbe’t-tahlîfi’ş-şer‘î mûcebiyle müdde‘î-i merkūm Serkiz zimmî bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 28 min-Zilhicce sene 1205