Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 620 Hüküm no: 982 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha Hanım’ın damadı Ahmed b. Mehmed Emin’e olan borcunu ödemesi Ma‘rûz; Medîne-i Üsküdar’da Kefçe mahallesinde sâkin Ahmed b. Mehmed Emin nâm kimesne medîne-i mezbûrede mahfil-i bâbda meclis-i şer‘-i hatîrde hâlâ kayınvâlidesi mu‘arrefetü’z-zât Zeliha bt. Osman nâm hatun mahzarında mezbûre Zeliha Hatun târih-i i‘lâmdan iki sene mukaddem emlâkimden beş guruş kıymetli sekiz aded cedîd arakıye ile beher vakıyyesi on altışar guruşa olmak üzere altmış dört guruş kıymetli dört vakıyye harîr bürünceğimi emrimsiz âhara bey‘ ve istihlâk etmekle meblağ-ı mecmû‘-ı mezkûr altmış dokuz guruş hakkımı hâlâ taleb ederim deyü da‘vâ ve mezbûre Zeliha Hatun cevâbında zikr olunan arakıyeler ile dört vakıyye bürünceği ancak otuz üç guruşa bey‘ etmiş idim deyü ikrârından sonra müdde‘iye-i mezbûrun ziyâde müdde‘âsı olan otuz altı guruşu inkârından mâ‘adâ mukırr olduğu meblağ-ı merkūm otuz üç guruşu dahi tamamen kendiye def‘ ü teslîm etmiş idim deyü eylediği def‘ini ve müdde‘î-i mezbûr Ahmed ziyâde müdde‘âsını isbâta kādireler olamayıp her birinin talebiyle âhar[ı] gıbbe’t-tahlîfi’ş-şer‘î mûcebiyle müdde‘î-i mezbûr ziyâde müdde‘âsıyla mezbûre Zeliha Hatun’a bilâ-beyyine mu‘ârazadan ba‘de’l-men‘ mezbûre Zeliha Hatun mukırra ve mu‘terife olduğu meblağ-ı merkūm otuz üç guruşu müdde‘î-i mezbûr Ahmed’e edâ ve teslîme tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-R sene 1206