Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 621 Hüküm no: 983 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Apostol’un İstori v. Kostanti’ye olan borcunu ödemesi Ma‘rûz; Mudanya kazâsı re‘âyâsından arzuhâl eden İstovri v. Kostanti nâm zimmî medîne-i Üsküdar’da meclis-i şer‘-i hatîrde medîne-i mezbûreye tâbi‘ Çenger karyesi mütemekkinlerinden arzuhâlde ismi mezkûr Yorgi v. Apostol nâm zimmî muvâcehesinde târih-i i‘lâmdan beş ay mukaddem mâlımdan bin dört yüz vakıyye arakımı merkūm Yorgi zimmî menziline bi-tarîki’l-emâne vaz‘ ve teslîm eylediğimde beher vakıyyesi yirmi dörder paraya olmak üzere merkūm Yorgi ile şerîk olacak olduğumda merkūm Yorgi zimmî bin altmış paraya bey‘ edip ziyâdesini beynimizde taksîm ederiz deyü beni avk u tehîr ba‘dehû beher kıyyesini altmış paraya âhara bey‘ edip semeni iki bin yüz guruşa bâliğ olmuş iken merkūm Yorgi zimmî ancak doksan yedi guruşunu bana teslîm ve mâ‘adâsı olan iki bin üç guruş zimmetinde kalıp hattâ yirmi beş gün mukaddem mahmiye-i İslâmbol’da Eminönü İskelesi’nde kahvede ber-vech-i muharrer taleb eylediğimde zikr olunan arak semeninden bâkī iki bin üç guruşdan dokuz yüz kırk üç guruş üzerine benimle sulh olup bedel-i sulh-ı merkūm dokuz yüz kırk üç guruş zimmetinde bana deyni olduğunu ikrâr etmekle bedel-i sulh olan meblağ-ı merkūm dokuz yüz kırk üç guruşu dahi bana edâ etmeyip hâlâ zimmetinde olmağla taleb ederim deyü da‘vâ ve merkūm Yorgi cevâbında fi’l-hakīka müdde‘î-i mezbûr mâlından bin dört yüz vakıyye arak bi-tarîki’l-emâne menzilime vaz‘ edip ba‘dehû yedi yüz vakıyyesini beher vakıyyesi onar paraya olmak üzere bana ba‘de’l-bey‘ yedi yüz vakıyyesi menzilimde kaldıkda Devlet-i aliyye tarafından bâ-emr-i âlî men‘ olunduğuna binâen ben dahi müdde‘î-i merkūma menzilimde olan arakı ihrâc eyle ve illâ deryâya ilkā ederim deyip ol dahi ihrâc etmemekle deryaya ilkā eyledim deyü te‘addîsini ikrâr ve sulh-ı mezkûru ve bedel-i sulh zimmetinde olduğunu inkâr etmeğin müdde‘î-i merkūm ber-vech-i muharrer sulhu ve bedel-i sulh-ı mezkûr dokuz yüz kırk üç guruş zimmetimdedir deyü ikrârını lede’t-tezkiye udûl-i millet-i Nasârâdan oldukları zâhir olan Kosti v. Panayot ve Todori v. Hüdaverdi nâm zimmîler şehâdetleriyle muvâcehesinde vech-i şer‘î üzere isbât etmeğin mûcebiyle bedel-i sulh-ı merkūm dokuz yüz kırk üç guruşu müdde‘î-i merkūma edâ ve teslîme merkūm Yorgi zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 7 min-S sene 1206