Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 622 Hüküm no: 984 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mehmed’in borcunu ödemesi Ma‘rûz; Askerî tâifesinden Ali Beşe b. Mehmed nâm kimesne medîne-i Üsküdar’da meclis-i şer‘-i hatîrde yine askerî tâifesinden Ahmed Ağa b. Mehmed nâm kimesne muvâcehesinde mezbûr Ahmed Ağa târih-i i‘lâmdan dokuz ay mukaddem bi’d-defa‘ât yedimden istidâne ve kabz eylediği otuz guruş ve mezbûr Ahmed Ağa’nın bi-şarti’r-rücû‘ emriyle âhardan iştirâ ve kendi yedine teslîm eylediğim kutnî bir entari semeninden yirmi beş guruş ve yine mezbûrun kezâlik emriyle dâyini gāib ani’l-meclis Kolansız Süleyman nâm kimesneye deyni olmak üzere edâ ve teslîm eylediğim seksen guruş ile yedimden iştirâ ve kabz eylediği bir çadır semeninden beş guruş ki cihât-ı mezkûreden cem‘an yüz kırk guruş zimmetinde hakkım olup hatâ târih-i i‘lâm günü ol-mikdâr meblağ bana deyni olduğunu ikrâr ü i‘tirâf etmekle meblağ-ı merkūm yüz kırk guruşu mezbûr Ahmed Ağa’dan taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr Ali Beşe ber-vech-i muharrer müdde‘âsını lede’t-tezkiye adâletleri zâhir olan es-Seyyid el-Hâc Mehmed b. es-Seyyid Hasan ve Mehmed b. Mehmed Said nâm kimesneler şehâdetleriyle ber-nehc-i şer‘î muvâcehesinde isbât etmeğin mûcebiyle meblağ-ı merkūm yüz kırk guruşu müdde‘î-i mezbûr Ali Beşe’ye edâ ve teslîme mezbûr Ahmed Ağa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 12 min-Safer sene 1206