Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 622 Hüküm no: 985 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hanım’ın boşandığı kocasından alacaklarını tahsil ettiği Ma‘rûz; Medîne-i Üsküdar’da Selami mahallesinde sâkine mu‘arrefetü’z-zât Şerife Âişe bt. el-Hâc Osman medîne-i mezbûrede mahfil-i bâbda meclis-i şer‘-i hatîrde zevc-i sâbıkı el-Hâc Osman b. Ali mahzarında ben mezbûr el-Hâc Osman’ın on beş guruş mehr-i müeccel tesmiyesiyle zevce-i medhûlün-bihâsı iken târih-i i‘lâmdan bir sene mukaddem beni tatlîk etmekle mârrü’z-zikr on beş guruş mehrim ile zevciyet beynimizde kāime iken yedimden istidâne ve kabz eylediği sekiz guruş kıymetli bir âyetli? altun ki cem‘an yirmi üç guruş hakkımı taleb ederim deyü da‘vâ ol dahi cevâbında müdde‘iye-i mezbûreyi tatlîkini ve mehr-i mezkûru ancak on guruş olduğunu ikrâr ziyâde beş guruş ile zikr olunan altunu ber-vech-i muharrer ahzını inkâr etmeğin müdde‘iye-i mezbûre ber-vech-i muharrer ziyâde on üç guruş müdde‘âsını beyân ve isbâta kādire olamayıp talebiyle mezbûr el-Hâc Osman gıbbe’t-tahlîfi’ş-şer‘î, mûcebiyle müdde‘iye-i mezbûre ziyâde müdde‘âsıyla mu‘ârazadan ba‘de’l-men‘ mezbûr el-Hâc Osman mukırr u mu‘terif olduğu on guruş mehr-i mezkûru zevcesi mezbûreye edâ ve teslîm eyledikde ol dahi ahz ü kabz edip husûs-ı mezkûra ve hukūk-ı zevciyet-i sâbıkāya müte‘allika âmme-i de‘âvîden mezbûr el-Hâc Osman’ın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 28 min-S sene 1206