Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 624 Hüküm no: 988 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin İbrahim b. Mehmed Kadri’de kalan para ve kıymetli eşyaları hakkında sulh olduğu Ma‘rûz; Medîne-i Üsküdar’da Vâlide-i Atik mahallesinde sâkin Ali Beşe b. Mustafa nâm kimesne medîne-i mezbûrede mahfil-i bâbda meclis-i şer‘-i hatîrde İbrahim b. Mehmed Kadri nâm kimesne mahzarında târih-i i‘lâmdan yedi ay mukaddem ben mezbûr İbrahim ile refâkat edip bir kayık içinde mahmiye-i İslâmbol’a giderken bostancıbaşı ağa beni ahz eylediği esnâda emlâkimden otuz bir guruş kıymetli bir göz [gövez] çuka biniş ve bir cedîd Mağrib şalı ve bir cedîd havlum kayıkda kalıp mezbûr İbrahim bana teslîm etmek içün ahz ü kabz etmekle eşyâ-i mezkûre mevcûde ise a‘yânını müstehleke ise ba‘de’s-sübût kıymet-i şer‘iyelerini hâlâ taleb ederim deyü eylediği da‘vâsından bâ-tavassut-ı muslihîn yirmi guruş mukābelesinde mezbûr İbrahim ile sulh olup eşyâ-i muharrere-i mezkûreye ve ziyâde kıymetlerine müte‘allika âmme-i de‘âvîden mezbûr İbrahim’in zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 5 min-Ra sene 1206