Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 625 Hüküm no: 990 Orijinal metin no: [80b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Mahmud’un At Hamalı İbrahim’e ait atın yaralanmasına sebep olmasından dolayı suçlu bulunmadığı Ma‘rûz; Medîne-i Üsküdar’da Büyük İskele’de sâkin At Hammâlı es-Seyyid İbrahim b. Hüseyin nâm kimesne meclis-i şer‘-i hatîrde Süleyman b. Mahmud nâm kimesne mahzarında târih-i i‘lâmdan altı gün mukaddem emlâkimden altmış guruş kıymetli bir re’s atımın üzerine hatab tahmîl ve hizmetkârım işbu hâzır bi’l-meclis Ali nâm kimesne yediyle medîne-i mezbûrede Atpazarı dâhilinde Debbâğhâne’ye irsâl eylediğimde mezbûr Süleyman zikr olunan atın yularını hizmetkârım mezbûr Ali yedinden fuzûlî ahz ve Debbâğhâne-i mezkûrede hatab ve üzerinden geçirir iken zikr olunan atın kasığına hatab isâbet ve mecrûh olmağla noksân-ı kıymeti tazmîn olunmak matlûbumdur deyü da‘vâ ve mezbûr Süleyman cevâbında zikr olunan atı hâzır-ı mezbûr Ali’nin emriyle mahâll-i mezkûrdan hasbe’l-mu‘tâd geçirir iken isabet etmiş idi deyü ba‘de’d-def‘ ve’l-inkâr dâfi‘-i mezkûr def‘-i mezkûrunu lede’t-tezkiye adâletleri zâhir olan Bostanî Mehmed b. Mustafa ve Mehmed Emin b. Ahmed nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘î-i mezbûr es-Seyyid İbrahim husûs-ı mezkûrda mezbûr Süleyman’a bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-Receb sene 1205