Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 629 Hüküm no: 999 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın Osman b. Salih’e olan borcunu ödemesi Ma‘rûz; Medîne-i Üsküdar’da Atpazarı’nda sâkin Osman b. Salih nâm kimesne medîne-i mezbûrede mahfil-i bâbda meclis-i şer‘-i hatîrde el-Hâc Hasan b. el-Hâc İsmail nâm kimesne mahzarında bin iki yüz beş senesi Cumadelûlâsı gurresi târihiyle müverrah işbu yedimde olan bir kıt‘a deyn temessüğü nâtık olduğu üzere yedimden iştirâ ve kabz eylediği seksen guruş hakkımın yirmi beş guruşunu mezbûr el-Hâc Hasan’ın dâmâdı gāib ani’l-meclis Abdülhalim nâm kimesne yedinden ahz ü kabz ve elli beş guruşu bâkī zimmetinde kalmağla hâlâ taleb ederim deyü da‘vâ ve mezbûr el-Hâc Hasan cevâbında târih-i i‘lâmdan dört sene mukaddem gāib ani’l-meclis İmâm Ali Efendi’ye bir kıt‘a hüccet mantûkunca bâ-istiğlâl-i bağ dört yüz guruş ve üç senelik bâ-devr-i şer‘î nemâsı olan yüz seksen guruş ki cem‘an beş yüz seksen guruş deynime müdde‘î-i mezbûr Osman kefîl olmağla kefâletine binâen mezbûr İmâm Ali Efendi kefîl-i müdde‘î-i mezbûr Osman’dan meblağ-ı merkūm beş yüz seksen guruşu ba‘de’l-ahz ve’l-kabz ben dahi meblağ-ı merkūmdan beş yüz kırk guruşunu ve dâmâdım gāib-i mezbûr Abdülhalim yirmi beş guruşunu kefîl-i müdde‘î-i mezbûr Osman’a def‘ ü teslîm etmemizle müdde‘î-i mezbûrun benim deynim içün kefâletine binâen edâ eylediği meblağdan ancak zimmetimde on beş guruş deynim olup lâkin senden meblağ-ı mecmû‘-ı merkūmu tahsîl esnâsında ben iktizâ eden mahallere mâlımdan kırk guruş sarf etmemle senden lâzımdır deyü zikr olunan temessük derûnuna idhâl ve ol-vechile seksen guruş tahrîr etmişdir deyü eylediği def‘ini isbâta kādir olamayıp talebiyle kefîl-i müdde‘î-i mezbûr Osman’a yemîn teklif olundukda yemînden nükûl etmeğin mûcebiyle kefîl-i müdde‘î-i mezbûr Osman husûs-ı mezkûrda ziyâde kırk guruş müdde‘âsıyla mezbûr el-Hâc Hasan’a mu‘ârazadan ba‘de’l-men‘ mezbûr el-Hâc Hasan mukırr u mu‘terif olduğu meblağ-ı bâkī-i merkūm on beş guruşun kefîl-i müdde‘î-i mezbûr Osman’a edâsıyla ilzâm olunduğu bi’l-iltimâs huzûr-ı âlîlerine i‘lâm olundu. Fî 11 min-R sene 1206