Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 630 Hüküm no: 1001 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Drohi bt. Aydın isimli Nasraniye’nin bulunduğu mahalleden ihracı Ma‘rûz; Medîne-i Üsküdar’da Yenimahalle re‘âyâsından Sahak v. Kirkor ve Artin v. Ohan ve Bogos v. Oseb ve kirkor v. Kazer ve Bogos v. David ve Kirkor v. Bogos ve Kiragos v. Davit ve Avanis v. Kazer ve Norsis v. Avak nâm zimmîler ile Zarik bt. Agob ve Maryem bt. Serkiz ve Sima bt. Kirkor nâm Nasrâniyeler medîne-i mezbûrede mahfil-i bâbda meclis-i şer‘-i hatîrde mahalle-i mezbûrede mütemekkine Drohi bt. Aydın nâm Nasrâniye muvâcehesinde merkūme Drohi Nasrâniye kendi hâlinde olmayıp leyl ü nehâr şürb-i hamr edip mest ve lâ-yu‘kal olduğu hâlde cümlemize şutûm-ı galîza ile şetm ve ırzımızı hetk eylediğinden mâ‘adâ gecelerde ateşi muhâfaza edemeyip hattâ bundan akdem menzilinden ateş zuhûr etmekle merkūmun bi’l-cümle ef‘âl ü harekâtından bi’l-külliye emniyetimiz meslûb olmuşdur deyü sû-i hâlini muvâcehesinde ihbâr ve mahalle-i mezbûreden ihrâc olunmak bâbında fermân-ı âlîleri sudûrunu her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 7 min-R sene 1206