Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 631 Hüküm no: 1002 Orijinal metin no: [81b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parapiçe bt. Todori’nin terekesinin vârislerine taksimiyle kardeşi Kosti’ye olan borcunun ödenmesi Ma‘rûz; Mahmiye-i İslâmbol hısnı ebvâbından Kumkapı dâhilinde mütemekkin Todori v. Ligori nâm zimmî medîne-i Üsküdar’da mahfil-i bâbda meclis-i şer‘-i hatîrde medîne-i mezbûreye tâbi‘ Kādı karyesinde mütemekkine iken bundan akdem hâlike olan Prapiçe bt. Todori Nasrâniye’nin verâseti zevci gāib ani’l-beled Sarandi v. Todori nâm zimmî ile sadriye sagīre kızı Mariyora ve li-ebeveyn er karındaşı Kosti ve li-ebeveyn kız karındaşı Todoriye’ye münhasıra ve tashîh meselesi on iki sehm i‘tibârıyla üç sehmi zevci merkūma ve altı sehmi sagīre-i mezbûreye ve iki sehmi karındaşı merkūma ve bir sehmi kız karındaşı mersûmeye isâbeti tahakkukundan sonra sagīre-i mezbûre ile zevc-i gāibin hisse-i irsiyesini ahz ve hıfza kıbel-i şer‘den vasî nasb olunup hâlike-i merkūmenin terekesinden ber-mûceb-i defter-i kassâm hisselerine vâzı‘ü’l-yed olan karındaşı merkūm Kosti zimmî muvâcehesinde hâlike-i merkūme Prapiçe Nasrâniye helâkinden üç ay mukaddem yedinden [yedimden] istidâne ve kabz ve umûruna sarfla istihlâk eylediği dört yüz elli guruş hakkımı kable’l-ahz ve’l-istifâ hâlike olmağla tereke-i vâfiyesinden taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Todori zimmî ber-vech-i muharrer müdde‘âsını Mehmed Sadık b. Süleyman nâm kimesne ile Nikola v. Apostol nâm zimmî şehâdetleriyle muvâcehesinde vech-i şer‘î üzere ba‘de’l-isbât ve’l-half mûcebiyle deyn-i meblağ-ı merkūm dört yüz elli guruşu tereke-i hâlike-i merkūmeden merkūm Kosti zimmînin makbûzu olan hissesinden müdde‘î-i merkūma edâya tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-Ra sene 1206