Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 633 Hüküm no: 1006 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın alacaklı olduğu iddiasını ispatlayamadığı Ma‘rûz; Mahmiye-i İslâmbol’da Hocapaşa’da sâkine mu‘arrefetü’z-zât Âişe bt. İsmail nâm hatun medîne-i Üsküdar’da mahfil-i bâbda meclis-i şer‘-i hatîrde kezâlik zâtı mu‘arrefe Hadice bt. İbrahim nâm hatun mahzarında târih-i i‘lâmdan bir sene mukaddem mezbûre Hadice Hatun yedinden iştirâ ve kabz eylediğim ma‘lûmü’l-evsâf yağlıkcı emti‘ası semeninden kırk guruş deynim mukābelesinde emlâkimden elli dört guruş kıymetli Hind sevâîsi bir limonî entari ve otuz guruş kıymetli bir turuncu Lahor[î] şalımı mezbûre Hadice yedine rehin vaz‘ ve teslîm ve deyn-i meblağ-ı merkūmun yirmi altı guruşunu bi’d-defa‘ât kendiye edâ ve bâkī on dört guruş deynimi yedimden ba‘de’l-ahz fekk-i rehn murâd ederim deyü da‘vâ ve mezbûre Hadice Hatun cevâbında meblağ-ı merkūm yirmi altı guruşu ahzını ikrâr ve bâkī on dört guruş mukābelesinde dahi müdde‘iye-i mezbûrenin ancak yedime rehin vaz‘ eylediği bir şalî entarisini ba‘de’l-izn ve’l-icâze on dört guruşa âhara bey‘ ve deyn-i bâkī-i merkūm on dört guruşa mahsûb ve takas etmiş idim deyü ziyâdeye bey‘ini ve zikr olunan Hind sevâîsi entari ile Hind şalı ber-vech-i muharrer irtihânını inkâr etmeğin müdde‘iye-i mezbûre ber-vech-i muharrer zikr olunan Hind sevâîsi entari ile mezkûr şalı mezbûre Hadice’nin yedine rehin vaz‘ u teslîmini ve mezkûr şalî entariyi meblağ-ı merkūm on dört guruşdan ziyâdeye bey‘ini isbâta kādire olamayıp talebiyle mezbûre Hadice gıbbe’t-tahlîfi’ş-şer‘î mûcebiyle müdde‘iye-i mezbûre husûs-ı mezkûrede mezbûre Hadice’ye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Rebî‘ülâhir sene 1206