Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 633 Hüküm no: 1007 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş İsmail Ağa’nın borcunu ödemesi Ma‘rûz; Medîne-i Üsküdar’da Kefçe mahallesinde sâkin Abdurrahman Ağa b. Veliyüddin nâm kimesne medîne-i mezbûrede mahfil-i bâbda meclis-i şer‘-i hatîrde Bostanî Derviş İsmail Ağa b. Mehmed nâm kimesne mahzarında bin iki yüz beş senesi Zilhicce’si yirminci günü taht-ı iltizâmımda olan vilâyet-i Anadolu’da vâki‘ Kütahya ve Karahisâr-ı sâhib ve Hamideli kazâlarının bir senelik duhân gümrüğü mahsûlünü bin seksen guruş bedel mukābelesinde hâlâ Kütahya’da sâkin Şemşeli İbrahim Ağa nâm kimesneye ilzâm eylediğimde ol dahi ba‘de’l-ilzâm bedel-i meblağ-ı merkūmun yedi yüz elli guruşunu bana teslîm etmek içün mezbûr Derviş İsmail Ağa yediyle irsâl, ol dahi meblağ-ı merkūmdan beş yüz guruşunu bana def‘ ü teslîm ve iki yüz elli guruşu zimmetinde bâkī kalıp hattâ târih-i i‘lâmdan bir gün mukaddem medîne-i mezbûrede Ayazma mahallesinde Hüseyin Ağa nâm kimesnenin menzilinde huzûr-ı Müslimînde meblağ-ı merkūm iki yüz elli guruşu emâneten makbûzu olup ba‘de’l-istihlâk bana deyni olduğunu ikrâr ü i‘tirâf ve hatt [u] hâtemini hâvî karz unvânıyla işbu bir kıt‘a deyn temessüğü[nü] dahi vermiş idi deyü ber-vech-i muharrer bir kıt‘a deyn temessüğü ibrazıyla ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm iki yüz elli guruşun müdde‘î-i mezbûra edâ ve teslîme mezbûr Derviş İsmail Ağa ilzâm olunduğu bi’l-iltimâs huzûr-ı âlîlerine i‘lâm olundu. Fî 11 min-R sene 1206