Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 634 Hüküm no: 1009 Orijinal metin no: [82a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirişçi Ömer Çelebi’nin alacaklı olduğu iddiasını ispatlayamadığı Ma‘rûz; Medîne-i Üsküdar’da Hacce hatun mahallesinde sâkin Kirişci Ömer Çelebi b. İsmail nâm kimesne medîne-i mezbûrede mahfil-i bâbda meclis-i şer‘-i hatîrde Attâr Hafız Süleyman b. Mustafa nâm kimesne mahzarında târih-i i‘lâmdan bir sene mukaddem beher destesini her kaç guruşa âhara bey‘ eder ise beher destesinde kendiye yirmi para ücret vermek üzere yedine teslim eylediğim emlâkimden otuz bir deste kirişimi mezbûr Hafız Süleyman beher destesini altışar guruşdan yüz seksen altı guruşa âhara bey‘ edip meblağ-ı merkūmdan bâkī altmış iki guruşdan ücreti olan on beş buçuk guruşunu kendi içün ba‘de’l-ihrâc bâkī kırk altı buçuk guruş zimmetinde hakkım kalmağla hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle mezbûr Hafız Süleyman gıbbe’t-tahlîfi’ş-şer‘î mûcebiyle müdde‘î-i mezbûr da‘vâ-yı mezkûresiyle mezbûr Hafız Süleyman’a bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 15 min-R sene 1206