Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 635 Hüküm no: 1011 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Madenoğlu Mehmed b. Abdullah’ın terekesinin vârislerine taksiminde ortaya çıkan ihtilafın giderildği Ma‘rûz; Medîne-i Üsküdar’a muzâfe Yoros nâhiyesine tâbi‘ Fenerhisârı karyesinde sâkin iken bundan akdem vefât eden Madenoğlu Mehmed b. Abdullah’ın verâseti zevce-i metrûkesi Halime bt. Hasan ile zevce-i uhrâsından mütevellid sulbî kebîr oğlu Bostanî Mehmed Ali’ye münhasıra ve terekesinin sekiz sehm i‘tibârıyla bir sehmi zevce-i mezbûreye ve yedi sehmi oğlu mezbûra isâbeti tahakkukundan sonra sâhib-i arzuhâl mezbûr Bostanî Mehmed Ali Çarşamba günü Dîvân-ı âlî’de ba‘dehû Üsküdar mahkemesinde meclis-i şer‘-i hatîrde arzuhâlde ismi mezkûr mu‘arrefetü’z-zât zevce-i mezbûre Halime Hatun ile zikri âtî bağa vâzı‘ü’l-yed Mustafa b. Ali mahzarında babam müteveffâ-ı mezbûrun terekesinden karye-i mezbûrede vâki‘ ma‘lûmü’l-hudûd bir bâb mülk menzil ve bir samanhâne ve ahur ve üç re’s inek ve buzağı üvey vâlidem mezbûre Halime ve yine karye-i mezbûrede vâki‘ ma‘lûmü’l-hudûd iki dönüm bir kıt‘a kürûmu mülk bağını mezbûr Mustafa üç seneden beri fuzûlî zabt ve vaz‘-ı yed etmeleriyle ber-tashîh-i merkūm bana isâbet eden hisse-i irsiyemi taleb ederim deyü da‘vâ ve zevce-i mezbûre cevâbında müteveffâ-yı mezbûrun hîn-i fevtinden mecmû‘-ı terekesini üvey oğlum mezbûr Mehmed Ali ile beynimizde taksîm edip zikr olunan menzil ve samanlık ve ahur ve ineğe altmış guruş kıymet takvîm ve bağ-ı mezkûru dahi üvey oğlum mezbûr Mehmed Ali kırk beş guruş semen-i makbûza gāib ani’l-meclis Dizdar es-Seyyid Mustafa Ağa nâm kimesneye ol dahi işbu mezbûr vâzı‘ü’l-yed Mustafa’ya bâ-hüccet-i şer‘iye bey‘ etmekle mecmû‘-ı terekesi yüz beş guruşa bâliğ olup lâkin müteveffâ-yı mezbûr zimmetinde karz-ı şer‘îden müsbet ve mahkûmün-bih otuz guruş hakkım ile mehr-i müeccelim on iki buçuk guruş ki cem‘an kırk iki buçuk guruş hakkım ihrâc olunup mâ‘adâ olan altmış iki buçuk guruşdan kendiye isâbet eden hissesini tamamen ahz ü istifâ edip müteveffâ-yı mezbûrun terekesine müte‘allika âmme-i de‘âvîden dahi zimmetimi ibrâ ve ıskāt etmiş idi deyü takrîrine mutâbık üç kıt‘a hüccet ibrâzıyla ba‘de’d-def‘ ve’l-inkâr dâfi‘a-i mezbûre Halime hatun def‘-i mezkûrunu udûlden İmâm el-Hâc Ali Efendi b. Osman ve Cizreli? [Cezâyirli] İbrahim Beşe b. Halil nâm kimesneler şehâdetleriyle vech-i şer‘î üzere isbât etmeğin mûcebiyle müdde‘î-i mezbûr da‘vâ-yı mezkûresiyle mezbûrân Mustafa ve Halime’ye bî-vech mu‘ârazadan men‘ olunduğu mübâşiri kapıkethudâsı kulları iltimâsıyla huzûr-ı âlîlerine i‘lâm olundu. Fî 27 min-Ra sene 1206