Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 637 Hüküm no: 1013 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbtiye Elveda Hanım’ın Ümmügülsüm Hanım’dan alacak talebine itibar edilmediği Ma‘rûz; Medîne-i Üsküdar’da Solaksinan mahallesinde sâkine şahsı mu‘arrefe Elveda bt. Hüseyin nâm Kıbtiye medîne-i mezbûrede mahfil-i bâbda meclis-i şer‘-i hatîrde mu‘arrefetü’z-zât Ümmügülsüm bt. İbrahim nâm hatun mahzarında ben bundan akdem vefât [eden] Kurd Ali b. Abdullah’ın yirmi guruş mehr-i müeccel tesmiyesiyle zevce-i medhûlün-bihâsı iken merkūm Ali târih-i i‘lâmdan iki sene mukaddem beni tatlîk ve mehr-i meblağ-ı merkūm yirmi guruş hakkımı zevc-i sâbıkım müteveffâ-yı merkūm kable’l-edâ vefât edip lâkin merkūm Ali hayatında mezbûre Ümmügülsüm Hatun’u techîz ve tekfîn ve mesârif-i sâiresini rü’yete vasî nasb u ta‘yîn eyledikden sonra emlâkinden nakden kendiye otuz guruş def‘ u teslîm etmekle meblağ-ı merkūmdan kadr-ı ma‘rûf mesârifi fürû-nihâde olunup mâ‘adâdan mehr-i mezkûremi taleb ederim deyü bilâ-beyyine takrîr-i meşrûhası üzere tasaddî eylediği da‘vâsında mezbûre Ümmügülsüm Hatun’a suâl dahi teveccüh eylemediği bi’l-iltimâs huzûr-ı âlîlerine i‘lâm olundu. Fî 25 min-Ra sene 1206