Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 446 Hüküm no: 480 Orijinal metin no: [106b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrullah Çelebi ile boşadığı karısı Fâtıma Hatun’un mehri ve eşyadan dolayı olan alacak davasında sulh oldukları Ma‘rûz. Muhzır Mehmed mübâşeretiyle Bâb Mahkemesi’ne ihzâr olunan Hayrullah Çelebi b. Mustafa’dan zevce-i mutallakası olan Fâtıma Hatun ba‘de’t-ta‘rîfi’ş-şer‘î meclis-i şer‘de zevcim mezbûr Hayrullah Çelebi bir gün mukaddem beni bâyinen tatlîk etmekle zimmetinde mütekarrir ve ma‘kūdun-aleyh on dört bin akçe mehr-i müeccelim ile eşyâ-i ma‘lûme semenlerinden altmış sekiz bin yedi yüz altmış akçe ki cem‘an seksen iki bin yedi yüz altmış akçe hakkımı mezbûr Hayrullah Çelebi’den taleb ve da‘vâ eylediğimde beynimizde nizâ‘-ı küllî cereyân etmişidi el-hâletü hâzihî da‘vâ-yı mezkûremden beni muslihûn [107a] tavassutuyla mezbûr Hayrullah Çelebi ile üç yüz elli guruş üzerine musâlaha eylediklerinde ben dahi sulh-ı mezbûru kabûl ve bedel-i sulh-ı mezkûru hâlâ ve def‘aten bana edâya iktidârı olmayıp te’cîle tâlib olduğundan târih-i i‘lâmdan sekiz ay tamamına değin bedel-i sulh-ı mezkûru bana edâ ve teslîm etmek üzere te’cîl eylediğimde ol dahi kabûl ve ber-vech-i muharrer edâya ta‘ahhüd eyledi dedikde mezbûr Hayrullah Çelebi tasdîk eylediği tescîl ve bi’l-iltimâs huzûr-ı âlîlerine i‘lâm olundu. Fî 7 Rebî‘ülevvel sene [1]143.