Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 639 Hüküm no: 1018 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Hüseyin’in boşadığı eşinin evinde kalan kömürleri talep etmesinin geçersiz olduğu Ma‘rûz; Medîne-i Üsküdar’da Mehmedpaşa mahallesinde sâkin Mahmud b. Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde Tersâne-i âmire çavuşlarından İbrahim Beşe hâzır olduğu hâlde Sâbıkā zevcesi Emetullah bt. Mehmed nâm hatun tarafından ber-vech-i âtî vekîl olduğu zât-ı mezbûreyi ârifân es-Seyyid Mehmed Salih b. el-Hâc İsmail ve Mehmed Emin b. Mustafa nâm kimesneler şehâdetleriyle sâbit olan es-Seyyid Efendi b. eş-Şeyh es-Seyyid Abdülvahhab Efendi mahzarında müvekkile-i mezbûre Emetullah Hatun bundan akdem zevcem olup mezbûrenin mahalle-i mezbûrede vâki‘ menzilinde sâkin iken tatlîkim esnâsında hâzır-ı mezbûr İbrahim Beşe’nin yedime îdâ‘ ve teslîm eylediği yüz elli beş guruş kıymetli beş bin vakıyye kömürünü mezbûre Emetullah Hatun’un menzilinde terk etmemle mevcûde ise aynını müstehleke ise ba‘de’s-sübût kıymet-i şer‘îsini taleb ederim deyü da‘vâ ve vekîl-i mezbûr cevâbında fi’l-hakīka müvekkilem mezbûre Emetullah Hatun mezbûr Mahmud’un mukaddemâ zevcesi olup mufârakat etdiklerinde hukūk-ı zevciyete ve beynlerinde cereyân eden cemî‘ ahz ü i‘tâ ve mu‘âmelât-ı şettâya müte‘allika âmme-i de‘âvîden her bini âharın zimmetini ibrâ ve ıskāt etmiş idi deyü takrîrine mutâbık ibrâz eylediği bir kıt‘a hüccet-i şer‘iye mazmûnunu müdde‘î-i mezbûr Mahmud ikrâr etmeğin mûcebiyle müdde‘î-i mezbûr Mahmud husûs-ı mezbûrda mezbûre Emetullah Hatun içün bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 min-R sene 1206