Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 640 Hüküm no: 1019 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mehmed’in boşadığı eşi ile sulh oldukları Ma‘rûz; Medîne-i Üsküdar’da Solaksinan mahallesinde sâkine ve zâtı mu‘arrefe Âişe bt. Hüseyin nâm Kıbtiye mahfil-i bâbda meclis-i şer‘-i hatîrde zevc-i sâbıkı İsmail b. Mehmed nâm Kıbtî muvâcehesinde mezbûr İsmail on guruş mehr-i müeccel tesmiyesiyle zevcim olup iki buçuk sene mukaddem beni tatlîk etmekle zimmetinde mütekarrir ve ma‘kūdun-aleyh olan on guruş mehr-i mezkûrum ile mezbûrun firâşından hâsıllar ve benden mütevellidân Mehmed Emin ve Süleyman nâm sagīrân içün iki buçuk senede masrûfum olan nafakalarını taleb ederim deyü eylediği da‘vâsından bâ-tavassut-ı muslihîn müdde‘âsı olan on guruş mehrinden meccânen fâriğa olup mezbûr İsmail dahi sagīrân-ı mezbûrânın nafakaları içün mâlından teberru‘an on beş guruş müdde‘iye-i mezbûreye def‘ ü teslîm etdikde ol dahi ba‘de’l-kabûl husûs-ı mezkûra ve târih-i i‘lâma gelince âmme-i de‘âvîden her biri âharın zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 13 min-R sene 1206