Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 640 Hüküm no: 1020 Orijinal metin no: [83a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anderya v. Dimitri’nin borcunu ödemesi Ma‘rûz; Medîne-i Üsküdar’da Yenimahalle’de mütemekkine ve şahsı mu‘arrefe Angeri bt. Kostanti nâm Nasrâniye meclis-i şer‘-i hatîrde Anderya v. Dimitri nâm zimmî muvâcehesinde merkūm Anderya zimmî târih-i i‘lâmdan beş ay mukaddem yedimden istikrâz ve kabz ve kendi umûruna sarfla istihlâk eylediği elli guruş hakkımı hâlâ taleb ederim deyü ba‘de’d-da‘vâ ve’l-istintâk merkūm Anderya zimmî cevâbında müdde‘iye-i mezbûreden elli guruş ahzını ikrâr lâkin altı guruşunu kendiye teslîm edip ancak kırk dört guruş hakkı zimmetimde bâkī kalmış idi deyü ikrâr ü i‘tirâf etmeğin mûcebiyle meblağ-ı bâkī-i merkūm kırk dört guruşun edâsıyla merkūm Anderya zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 14 min-R sene 1206