Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 641 Hüküm no: 1023 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suyolcu Kosti’nin Kadıköy’e gelen suların geçtiği yolların tamir ve künk döşeme masraflarından doğan alacaklarının tahsili Ma‘rûz; Medîne-i Üsküdar’da suyolcu tâifesinden Kosti v. Yani nâm zimmî medîne-i mezbûrede mahfil-i bâbda meclis-i şer‘-i hatîrde medîne-i mezbûreye tâbi‘ Kādı karyesi sükkânından Salih Ağa b. Ahmed ve Molla Mehmed b. Mustafa ve Abdi Efendi b. İbrahim ve es-Seyyid Mehmed Emin Efendi b. Hasan nâm kimesneler mahzarlarında karye-i mezbûreye cârî olan mâ-i lezîzin yolları harâb olup ta‘mîr ve termîme muhtâc olmağla mezbûrûnun bi-şarti’r-rücû‘ emirleriyle mâ-i merkūm yollarına ferş eylediğim altı yüz kırk yedi aded künk beheri yirmişer paradan üç yüz yirmi üç buçuk guruş ve sepet ve ıhlamur ve kürek içün yirmi iki buçuk guruş ve yevmiye birer guruşdan on iki nefer halîfelerime ücretimiz olan iki yüz kırk yedi guruş ki cem‘an beş yüz doksan üç buçuk guruş hakkımın iki yüz otuz dört guruşunu bi’d-defa‘ât ahz ü istifâ ve üç yüz elli dokuz buçuk guruş hakkım bâkī kalmağla taleb ederim deyü da‘vâ ve mezbûrûn cevâblarında fi’l-hakīka müdde‘î-i merkūm Kosti zimmî bizim ve ahâli-i mezbûreden ma‘lûmü’l-esâmî kimesnelerden her birimizin bi’l-ittifâk emrimiz ile mâ-i merkūmun yollarını ta‘mîr ve termîmine ol-mikdâr meblağ sarf edip üç yüz elli dokuz buçuk guruş hakkı bâkī kalmış idi deyü her biri ba‘de’l-i‘tirâf meblağ-ı bâkī-i merkūmu def‘aten edâ edemeyip alâ-mehl edâ etmek üzere her biri ta‘ahhüd eylediklerinde müdde‘î-i merkūm dahi râzı olup bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 8 min-Rebî‘ülâhir sene 1206