Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 642 Hüküm no: 1024 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Mustafa’nın Ali b. Osman hakkında açtığı davaya itibar edilmediği Ma‘rûz; Medîne-i Üsküdar hâricinde Çavuşbaşı Çiftliği’nde sâkin Osman b. Mustafa nâm kimesne meclis-i şer‘-i hatîrde zikri âtî tarlaya mutasarrıfı izniyle vâzı‘ü’l-yed olan Ali b. Osman nâm kimesne mahzarında çiftlik-i mezkûr hudûdunda vâki‘ bir kıt‘a tarlanın mutasarrıfı gāib ani’l-meclis Bıyıklı Hasan nâm kimesne ile bir sene mukaddem şerîk olmak üzere buğday zer‘ ve hâsıl olan mahsûlü beynimizde taksîm etmiş iken mutasarrıf-ı mezbûr Bıyıklı Hasan zikr olunan tarlasını mezbûr Ali’ye verip mezbûr Ali dahi buğday zer‘ etmekle mukaddemâ ben zer‘ edip bir sene mukaddem mutasarrıfı bana izin vermekle mezbûr Ali’nin ber-vech-i muharrer müdâhalesi men‘ birle tarla-yı mezkûrdan keff-i yed eylemesi murâdımdır deyü eylediği da‘vâsı mesmû‘a olmadığı bi’l-iltimâs huzûr-ı âlîlerine i‘lâm olundu. Fî 19 min-R sene 1206