Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 642 Hüküm no: 1025 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Halil’in terekesinin vârislerine taksimi Ma‘rûz; Medîne-i Üsküdar’da Vâlide-i Atik mahallesi sükkânından olup mahrûse-i Burusa’da Demirkapı nâm mahâlde bundan akdem vefât eden Ali b. Halil b. İvaz nâm kimesnenin verâseti zevce-i metrûkesi Fatıma bt. Hüseyin ile babası gāib ani’l-meclis mezbûr Halil b. İvaz ve sagīr evlâdları Mustafa ve Asiye ve Zahide’ye ve on altı sehmi eb-i mezbûra ve otuz dört sehmi ibn-i mezbûra ve on yedişer sehmden otuz dört sehmi bintân-ı mezbûretâna isâbeti tahakkukundan sonra mu‘arrefetü’z-zât zevce-i mezbûre Fatıma Hatun kendi nefsinden asâleten ve gāib-i mezbûr ile sagīrûn-ı mezbûrûnun vasîyy-i mansûbesi olmağla vesâyeten müteveffâ-yı mezbûrun terekesine vaz‘-ı yedleri mütehakkık olan kezâlik zâtı mu‘arrefe diğer Fatıma bt. Abdullah nâm hatun ile mezbûre diğer Fatıma’nın sadrî kebîr oğlu Mehmed b. Hızır nâm kimesne muvâcehelerinde târih-i i‘lâmdan beş ay mukaddem zevcim müteveffâ-yı mezbûr Ali mezbûrân diğer Fatıma ile oğlu mezbûr Mehmed’in menzilinde müsâferet tarîkiyle sâkin iken mahrûse-i mezkûrede Demirkapı nâm mahâlde vefât etmekle zevcim müteveffâ-yı mezbûrun emlâkinden nakden dört yüz guruş ile lâbis olduğu eşyâ-i memlûkesinden mecmû‘-ı kıymetleri otuz dört guruşa bâliğ bir çuka cebe ve bir hançer ve bir çuka biniş ve bir dizlik ve bir yeleğini bi’l-asâle ve bi’l-vekâle taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını bir vechile beyân edemeyip mezbûrânın dahi yemîn edecekleri mütekarrir ve yemîn etdikleri sûretde sagīrûn-ı mezbûrûn mutazarrır ve sulh sagīrûn-ı mezbûr haklarında enfa‘ ve evlâ olmağla beynlerine muslihûn tavassut edip müdde‘iye-i mezbûre eylediği da‘vâsından on üç guruş bedel-i makbûza sulh olup ziyâde müdde‘âsı olan üç yüz seksen yedi guruş ve eşyâ-yı muharrere-i mezkûreye müte‘allika âmme-i de‘âvîden mezbûrân diğer Fatıma ve Mehmed’in zimmetlerini bi’l-asâle ve bi’l-vesâye ibrâ ve ıskāt onlar dahi medfû‘ları olan meblağ-ı merkūm on üç guruşa müte‘allika da‘vâdan müdde‘iye-i mezbûrenin zimmetini ibrâ edip ve her biri âharın ber-vech-i muharrer ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 9 min-Rebî‘ülâhir sene 1206