Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 643 Hüküm no: 1026 Orijinal metin no: [83b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simidci ve çörekci esnafının nizama aykırı olarak imâlât yapan Seyyid Mustafa’nın ikaz edilmesi talebinde bulundukları Ma‘rûz; Medîne-i Üsküdar’da simidci ve çörekci esnâfının kethudâları Ahmed b. Mehmed ve yiğitbaşıları Hafız Ali b. Süleyman ve ustalarından es-Seyyid Ahmed b. Mustafa ve Abdullah Usta b. Hüseyin ve diğer Abdullah Usta b. Ahmed ve Halli Usta b. Mehmed ve Receb Usta b. Musa ve İbrahim Usta b. Mehmed ve Hüseyin Usta b. Osman ve Mustafa b. Mehmed nâm kimesneler bi-ecma‘ihim mahfil-i bâbda meclis-i şer‘-i hatîrde es-Seyyid Mustafa b. Ali muvâcehesinde mezbûr es-Seyyid Mustafa esnâfımızdan olup beynimizde kendi tabhıyla hânesinde çörek ve boğaça yapıp çarşı ve pazarlarda füruht eder koltukcu ta‘bîr olunur kimesneden olup bundan akdem medîne-i mezbûrede haffâfhâne kurbünde Hüseyin Usta ile bilâ-sermâye amel ile şirket edip on bir gün mürûruyla dükkânından çıkıp terk edip esnâfımız beyninde ihtilâli mûcib harekât-ı nâ-marzıyesiyle cümlemizin emniyetlerimiz meslûb olmuşdur deyü muvâcehesinde ihbâr ve fî-mâ ba‘d esnâfımız dükkânlarında olduğuna rızâmız olmayıp bundan böyle kangı fırında olur ise ihrâc olunmak üzere bizleri tahlîs buyurulmak bâbında fermân-ı âlî-şân sudûrunu istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 19 R sene 1206