Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 644 Hüküm no: 1027 Orijinal metin no: [83b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim Ağa’nın terekesinin vârislerine taksimiyle borçlarının ödenmesi Ma‘rûz; Vilâyet-i Anadolu’da Tire kazâsı ahâlisinden olup medîne-i Üsküdar’da müsâfiren sâkin el-Hâc Ali b. Halil medîne-i mezbûrede mahfil-i bâbda meclis-i şer‘-i hatîrde medîne-i mezbûrede Ahmed Çelebi mahallesinde sâkin iken bundan akdem vefât eden Kaftanağası el-Hâc İbrahim Ağa b. Ahmed’in verâseti zevcesi Şerife Hibetullah bt. es-Seyyid Mehmed nâm hatun ile li-ebin kız karındaşı oğlu Mehmed ve li-ebin kız karındaşı kızı Şerife Emetullah’a münhasıra olduğu tahakkukundan sonra tereke-i müteveffâ-yı mezbûrdan hisse-i irsiyesine vâzı‘ü’l-yed olan mezbûre Şerife Emetullah Hatun’un sadrî kebîr oğlu ve tarafından vekîl-i müseccel-i şer‘îsi el-Hâc Mustafa b. Mehmed Tâhir mahzarında müteveffâ-yı mezbûr el-Hâc İbrahim Ağa üç sene mukaddem hayatında Sinop Kal‘ası’nda memûren sâkin iken yedimden istidâne ve kabz ve umûruna sarfla istihlâk eylediği beş yüz guruş hakkımı kable’l-edâ fevt olmağla terekesinden taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr el-Hâc Ali ber-minvâl-i muharrer müdde‘âsını udûl-i müzekkâdan es-Seyyid el-Hâc Süleyman b. el-Hâc Mehmed ve es-Seyyid İbrahim b. Mehmed ve Mustafa b. Mehmed ve es-Seyyid Mehmed b. el-Hâc Hüseyin nâm kimesneler şehâdetleriyle vech-i şer‘î üzere ba‘de’l-isbât ve’l-half mûcebiyle deyn-i meblağ-ı merkūm beş yüz guruşu müteveffâ-yı mezbûrun terekesinden edâ etmek üzere müvekkilesine izâfet ile vekîl-i mezbûra tenbîh olunduğu bi’l-iltimâs huzûr-ı âlîlerine i‘lâm olundu. Fî 19 min-R sene 1206