Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 647 Hüküm no: 1033 Orijinal metin no: [84a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Haçir v. Haçador’un satın aldığı gedik hakkında Karabet ve Tatyos’un yaptıkları müdahalenin men edilmesi Ma‘rûz; Medîne-i Üsküdar’da Balaban İskelesi kurbünde Enserci Haçir v. Haçador nâm zimmî medîne-i mezbûrede mahfil-i bâbda meclis-i şer‘-i hatîrde yine iskele-i mezkûre kurbünde keresteci dükkânında mütemekkin iken bundan akdem hâlik olan Saranos v. Ağya nâm zimmînin verese-i münhasırasından li-ebeveyn er karındaşı Tatyos ve Karabet veledeyi’l-merkūm Ağya nâm zimmîler muvacehelerinde dükkân-ı mezkûr derûnunda mevcûd beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı şâyi‘i keresteci el-Hâc Memiş Ağa’nın ve nısf-ı şâyi‘-i âharı hâlik-i merkūmun yedinde mülkü iken hâl-i hayatında helâkinden sekiz gün mukaddem keresteci ustaları huzûrunda dükkân-ı mezkûrda hâlik [mâlik] olduğu nısf keresteci gediği hissesi âlâtını beş yüz guruş tesmiyesiyle bana bey‘ u temlik ben dahi ber-vech-i muharrer iştirâ ve temellük ve kabûl edip semeni olan meblağ-ı merkūm beş yüz guruşu cihet-i karzdan bana deyni olan ol-mikdâr beş yüz guruşa mahsûb ve takas etmekle ben dahi mukāssa ve kabûl edip ol-vechile gedik ta‘bîr olunur olunan nısf âlât-ı lâzıme-i ma‘lûme mülk-i müşterâm olmuş iken merkūmân Tatyos ve Karabet bi-gayrı hakkın zabtıma mümâna‘at ve tasarrufuma müdâhale etmeleriyle suâl olunup müdâhaleleri men‘ u def‘ olunmak matlûbumdur deyü da‘vâ ve merkūmân Tatyos ve Karabet zimmî cevâblarında nısf-ı âlât-ı mezkûre karındaşım hâlik-i merkūmun ile’l-helâk yedinde mülkü olup ve ba‘de-helâkihî bize mevrûs olmuş idi deyü ber-vech-i muharrer müdâhalelerini ikrâr ve hâl-i hayatında müdde‘î-i merkūma bey‘ini inkâr etmeğin müdde‘î-i merkūm Haçir zimmî ber-minvâl-i muharrer müdde‘âsını udûlden Keresteci es-Seyyid İsmail b. el-Hâc Memiş nâm kimesne ile yine Keresteci Serkiz v. Sefer nâm zimmî şehâdetleriyle muvâcehelerinde vech-i şer‘î üzere isbât etmeğin mûcebiyle merkūmân Tatyos ve Karabet’den her biri nısf âlât-ı mezkûre içün merkūm Haçir zimmîye bī-vech mu‘ârazadan men‘ olunduuğ bi’l-iltimâs huzûr-ı ālīlerine i‘lâm olundu. Fī 23 min-R sene 1206