Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 648 Hüküm no: 1034 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Rika’nın tüfek kurşunu ve kesici âletlerle yaralandığının tespit olunduğu Ma‘rûz; Bi’l-iltimâs kıbel-i şer‘-i şerîfden meb‘ûs Ali Efendi dâ‘îleri ve koru-yı hümâyûn zâbiti tarafından verâseti, karındaşı Nebi b. Hüseyin ve sâir mazbûtü’l-esâmî Müslimîn ile medîne-i Üsküdar’a muzâfe Yoros nâhiyesine tâbi‘ Hamza Çelebi Çiftliği demekle ma‘rûf çiftlik hudûdu dâhilinde Büyükbakkallar karyesinde mütemekkin Yani v. Rika nâm zimmînin mütemekkin olduğu menziline varıp akd-i meclis-i şer‘-i şerîf etdikde merkūm Yani zimmî meclis-i ma‘kūd-ı mezkûrda bast-ı kelâm edip târih-i i‘lâm gecesi sâ‘at ikide karye-i mezbûre kurbünde Kayışpınarı nâm mahâlden gelirken gāib ani’l-meclis Dimitri nâm zimmî bi-gayrı hakkın amden kurşunuyla sol kolumun bileği üzerinden bir yerinden darb ve nüfûz ve şiş ta‘bîr olunur bıçak ile başımın üç yerinden muvâzzahaten şec ve sol kulağım dibinden bir yerinden ve sağ yanağım üzerinden bir yerinden ve üst dudağım üzerinden bir yerinden ve çenem üzerinden bir yerinden ve boğazım üzerinden bir yerinden ve sağ omuzum üzerinden üç yerinden ve gö[ğ]sümün sağ tarafından bir yerinden ve sağ elimin vasatî parmağımın evvelki mafsalından ve yine sağ elimin hinsır parmağımın ikinci mafsalından ve sol elimin vasatî ve hinsır parmaklarımın ikinci mafsallarından ve kasığımın sol tarafı üzerinden bir yerinden ki cem‘an on sekiz aded uzvumdan darb ü şec ve cerh eylediğinden mâ‘adâ tüfenk kundağıyla belime ve zahrıma dahi darb ve kara bere etmekle kıbel-i şer‘den keşf ve mu‘âyene olunmak matlûbumdur dedikde cerrâh tâifesinden el-Hâc Ali ve sâir mazbûtü’l-esâmî Müslimîn ile a‘zâsına nazar eylediklerinde fi’l-hakīka merkūm Yani zimmînin a‘zâsının ber-vech-i muharrer on sekiz mahâllinden meşcûc ve mecrûh ve arkasından kara bere idiğini ba‘de’l-keşf ve’l-mu‘âyene vâki‘ hâli mezbûr dâ‘îleri mahâllinde ketb ü tahrîr, ba‘dehû mâ‘an meb‘ûs ümenâ-i şer‘le meclis-i şer‘a gelip alâ-vukū‘ıhi [inhâ] eylediği bi’l-iltimâs huzûr-ı âlîlerine i‘lâm olundu. Fî 20 min-R sene 1206