Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 650 Hüküm no: 1040 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırcı Kasım’ın Avanis v. Ohan ve iki arkadaşından alacaklı olduğu iddiasını ispatlayamadığı Ma‘rûz; Medîne-i Üsküdar’da Atpazarı’nda handa misâfiren sâkin Katırcı Kasım b. Mehmed nâm kimesne mahfil-i bâbda meclis-i şer‘-i hatîrde Avanis v. Ohan ve Avadik v. Matos ve Artin v. Markon nâm zimmîler muvâcehelerinde müstecirim gāib ani’l-meclis ismi ma‘lûmum olmayan zimmî zimmetinde bir re’s katır ücretinden yirmi altı guruş cihet-i karzdan iki guruş ki cem‘an yirmi sekiz guruş hakkıma târih-i i‘lâmdan otuz gün mukaddem merkūmûn Avanis ve Avadik ve Artin zimmîler tarafeynden bi’l-emr ve’l-kabûl mâ‘an kefîl ve dâminler olmalarıyla meblağ-ı merkūm yirmi sekiz guruşu merkūmûnun kefâletlerine binâen taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip talebiyle merkūmûn Avanis ve Avadik ve Artin zimmîlerden her biri gıbbe’t-tahlîfi’ş-şer‘î mûcebiyle müdde‘î-i mezbûr da‘vâ-yı mezkûresiyle merkūmûn Avanis ve Avadik ve Artin zimmîlere bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 22 min-N sene 1206