Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 448 Hüküm no: 487 Orijinal metin no: [107b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un el-Hâc Musa b. el-Hâc Mustafa üzerine açtığı davanın tezvir olduğu Bâ-mühr-i hazret-i efendi. Ma‘rûz. Arzuhâl eden Zeyneb Hatun hâlâ Mahmudpaşa hamamcısı olan el-Hâc Musa b. el-Hâc Mustafa nâm kimesneden zevcim müteveffâ el-Hâc Mehmed bin yüz yirmi dokuz senesinde Tophane’de Cihângir Mahallesi ahâlîsinden olup ismi el-Hâc Muslu b. el-Hâc Ahmed olan nâm kimesneye mâlından beş yüz guruş ikrâz, merkūm el-Hâc Muslu dahi iktirâz ve kabz eylediğinden sonra merkūm el-Hâc Muslu târih-i merkūmda Ahî Çelebi Mahkemesi’nde hilâfeten müvellâ olan Mustafa Efendi huzûrunda deyn-i mezbûru i‘tirâf ve hüccet dahi olmuş iken ismini el-Hâc Musa b. el-Hâc Mustafa olmak üzere tağyîr ve deyn-i mezkûru inkâr eyledi deyü asâleten ve evlâd-ı sıgārının vasîleri olmak üzere vesâyeten da‘vâ eyledikde merkūm el-Hâc Musa bi’l-külliye inkâr edip merkūme Zeyneb Hatun ikāmet-i beyyine için istimhâl etmekle mehl-i şer‘î ile ba‘de’l-imhâl bir vechile ikāmet-i beyyineye kādir olmamağla talebiyle merkūm el-Hâc Musa tahlîf olunup merkūme Zeyneb Hatun bî-vech-i şer‘î mu‘ârazadan men‘ olundukdan sonra merkūm el-Hâc Musa’nın babası el-Hâc Mustafa’nın vaz‘ eylediği ismi Musa olup ve târih-i i‘lâma gelince Tophane’de Cihângir Mahallesi’nde menzile mâlik ve icâre ile dahi sâkin olmayıp yirmi seneden beri İstanbul’da Vâlidehanı kurbünde Dâyehatun Mahallesi’nde sâkin olduğunu vukūf-ı tammı olan bî-garaz Müslimînden cemm-i gafîr ve cem‘-i kesîr alâ-tarîkı’ş-şehâde haber verip merkūme Zeyneb Hatun’un da‘vâsı tezvîr olduğu huzûr-ı âlîlerine i‘lâm olunduğu. Fî 9 Rebî‘ülevvel sene [1]143.