Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 450 Hüküm no: 489 Orijinal metin no: [107b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli’nin borcunu ödemeden hapisten çıkmasının meşru olmadığı Ma‘rûz. Arzuhâl eden Veli dâyinlerinden Ahmed Ağa nâm kimesne ile Kasab Panayot ve Bakkāl Dimitri ve Terzi Kirkor nâm zimmîler muvâcehelerinde mezbûrûna sekiz yüz sekiz guruş vâcibü’l-edâ deynim olup edâsına bir vechile kudretim olmamağla dokuz aydan beri İstanbul’da Muhzır Ağa tomruğunda mahbûsum hâlâ üzerime lâbis olduğum libâsımdan gayrı bir nesneye mâlik olmayıp müflis ve mu‘dim ve mu‘sirim deyü habsden ıtlâkını da‘vâ ve merkūmûn dahi hâlâ deyn-i mezbûru muzu edâya vâfî malı vardır deyü iflâsını inkâr edip yesâr beyyinesi evlâ olmağla evvelâ müdde‘ûn-ı merkūmûndan merkūm Veli’nin yesârına beyyine taleb olundukda sâkin olduğu Ali el-Fenarî Mahallesi ahâlîsinden Musa Efendi b. Musa ve el-Hâc Mustafa b. Ahmed ve Ahmed b. Hüseyin ve Seyyid Mehmed b. Ahmed nâm kimesneler mezbûr Veli’nin el-an müdde‘ûn-ı merkūmûna sekiz yüz sekiz guruş deynine vâfî mâlı olup edâ-yı deyne kudreti vardır deyü muvâcehesinde yesârına şehâdet-i şer‘iyye [108a] ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Veli’nin edâ-yı deyn etmedikçe habsden ıtlâkı meşrû‘ olmadığı huzûr-ı âlîlerine i‘lâm olundu. Fî 10 Rebî‘ülevvel sene [1]143.