Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 450 Hüküm no: 490 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dükkana barut koymak töhmetiyle tutuklanan es-Seyyid Mustafa’nın affedilmesi talebi Bâ-mühr-i hazret-i efendi. Ma‘rûz. İstanbul’da Sulu Manastır kurbünde Abdiçelebi Mahallesi ahâlîsinden İmâm Ali Efendi ve Müezzin Mustafa Halîfe ve Abdullah Ağa ve Ahmed Çelebi ve Mustafa Ağa ve Hüseyin Çelebi ile Na‘lçacılar kethüdâsı el-Hâc İbrahim ve ihtiyârlarından Mustafa ve Mehmed Efendi ve diğer Mehmed ve Ahmed ve Fazlullah ve Mehmed nâm kimesneler meclis-i şer‘de tâife-i merkūmeden es-Seyyid Mustafa b. es-Seyyid el-Hâc Ali mahzarında merkūm es-Seyyid Mustafa bundan akdem taht-ı icâresinde olup mahalle-i mezbûrede vâki‘ âhara ferâgat eylediği dükkâna iki lüleye bir mikdâr barut bırakmak töhmetiyle ahz ve teşekkî olunmuş idi el-hâletü hâzihî mezbûr es-Seyyid Mustafa kendi hâlinde olup fîmâ-ba‘d ol makūle fesâda ictirâ etmemek üzere ahd ü misâk ve karındaşı es-Seyyid İbrahim dahi nefsine ve hîn-i mütâlebede meclis-i şer‘a ihzârına kefîl olmağla cürmü afvolunmak ricâsıyla ahvâli i‘lâm olunmak murâdımızdır deyü ilhâh etmeleriyle mübârek geceler hürmetine cürmü afvolunmak bâbında fermân hazret-i veliyyü’l-emrindir. Fî 11 Rebî‘ülevvel sene [1]143.