Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 451 Hüküm no: 491 Orijinal metin no: [108a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. İbrahim’in Ali b. Pir Ali üzerine açtığı deve satışı davasından men olunduğu Ma‘rûz. Mumcu Ebûbekir Beşe mübâşeretiyle Bâb Mahkemesi’ne ihzâr olunan Ali b. Pîr Ali nâm deveciden yine deveci tâifesinden Hüseyin b. İbrahim meclis-i şer‘de dört sene mukaddem yedimden müşterâ ve makbûz üç re’s deve semeninden altmış altı guruş zimmetinde hakkım olmağla taleb ederim deyü da‘vâ ol dahi cevâbında zikrolunan üç re’s deve Türkmen Ağası müteveffâ Mustafa Ağa b. Abdullah’dan hayâtında ma‘an iştirâ olunmağla müdde‘î-i mezbûrun emriyle semen-i mezkûr altmış altı guruşu müteveffâ-i mezbûrun karındaşı Mehmed Ağa’ya def‘ ve teslîm ol dahi yedimden ahz u kabz eyledi deyü ba‘de’d-def‘ ve’l-inkâr mezbûr Ali def‘-i mezkûrunu şuhûd-ı udûlden yine tâife-i mezbûreden Hasan b. el-Hâc Süleyman ve Molla Yusuf b. Ebûbekir nâm kimesneler ile vech-i şer‘î üzere muvâcehesinde isbât etmeğin mûcebince mezbûr Hüseyin bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 11 Rebî‘ülevvel sene [1]143.