Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 452 Hüküm no: 493 Orijinal metin no: [108a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşadığı eşi Hadice Hatun’un eşyalarını vermesi için Hakkak Ali’ye tenbih olunduğu Ma‘rûz. Arzuhâl eden Hadice Hatun derûn-ı arzuhâlde ismi mastûr zevc-i muhâla‘ı Hakkâk Ali’den merkūm Ali beni bâyinen tatlîk eyledikde yedimde mevcûde eşyâ-i memlûkemden sarı çuka serpûş ve bir deryâyî? telli boyama ve bir peçe ve bir kabsız kedi kürkü ve iki tencere ve sekiz sahan ve sekiz lenger ve bir orta sini ve bir kebîr kahve ibriği ve bir sagīr kahve ibriği ve bir leğen ma‘a ibrik ve bir tâbe ve bir hamam tası ve bir kil? kutusu ve bir sepet sandığı ve bir gömleklik iplik ve iki zirâ‘ pişmiş iplik ve bir nısfı işlenmemiş hâre boğça ve bir işlenmiş anterilik bogasi ve bir kılabdanlı uçkur ve bir çuka ocak yaşmağı ve bir yeşil çuka kapı perdesi ve iki döşek ve beş yorgan ve bir lâciverd taş altın yüzük ve bir şalvar ve bir bürüncek donumu bi-gayr-ı hakkın gasben yedimden kabz eyledi deyü mevcûdunun a‘yânını müstehlek ise ba‘de’l-beyân kıymetini taleb ederim deyü ba‘de’d-da‘vâ ve’l-inkâr merkūme Hadice müdde‘âsı olan eşyâ-i muharrere-i mezbûreyi merkūm Hakkâk Ali bi-gayr-ı hakkın ahz u kabz eylediğini şuhûd-ı udûlden İbrahim Haseki b. Mustafa ve ve nisâ tâifesinden Fâtıma bt. Abdullah ve Âişe bt. İbrahim nâm hatunlar şehâdetleriyle vech-i şer‘î üzere isbât etmekle mûcebiyle eşyâ-i mezbûreden mevcûdunun a‘yânını müstehlek olan eşyânın ba‘de’l-beyân kıymetini merkūme Hadice Hatun’a teslîme mezbûr Hakkâk Ali’ye tenbîh olunduğu huzûr-ı âlîlerine i‘lâm olundu. Fî 11 min Ra sene 1143.