Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 458 Hüküm no: 508 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taraklıborlu kalesi dizdarlığına es-Seyyid Ebûbekir Ağa’nın tayini talebi Ma‘rûz. Dîvân-ı âlî çavuşlarından Mustafa Çavuş mübâşeretiyle izhâr-ı şer‘ olunan Mustafa nâm mühtedî muvâcehesinde vilâyet-i Anadolu’da vâki‘ Taraklıborlu ahâlîsinden müseccelü’l-esâmî yüz elli beş nefer Müslimîn meclis-i şer‘de mezbûr Mühtedî Mustafa işbu yedimizde olan iki kıt‘a kādı arzı ve bir kıt‘a mahzar mantûkunca kazâmızda nice türlü fesâd ve şekāvete müeddî ve envâ‘-ı tezvîrâta tasaddî eylediğine binâen üç sene mukaddem bâ-fermân-ı âlî nefy olunmuş iken yine kendi hâlinde olmayıp kazâ-i mezbûrede nice zamândan berü kal‘amız dizdârı olup bi’l-cümle ahâlî-i vilâyet kendinden hoşnûd ve şükrân olup mahall ü merhamet olan işbu hâzır bi’l-meclis es-Seyyid Ebûbekir Ağa’yı bir takrîb ile dizdârlıkdan azl ve kendi üzerine berât ettirip küllî gadretmişdir deyü mezbûr Mustafa’nın sû-i hâlini ihbâr edip zikrolunan dizdârlık mezbûr Mühtedî Mustafa ref‘inden yine mezbûr es-Seyyid Ebûbekir Ağa’ya tevcîh ve kemâ-kân ibkā ve mukarrer kılınmak bâbında fermân-ı âlîşân ricâsında oldukları mübâşir-i merkūm iltimâsıyla huzûr-ı âlîlerine i‘lâm olundu. Fermân hazret-i veliyyü’l-emrindir. Fî 9 Rebî‘ülâhir sene [1]143.