Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 459 Hüküm no: 510 Orijinal metin no: [110a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf menzilin tasarrufu konusunda Ali’nin Ahmed üzerine açtığı davada haksız olduğu Ma‘rûz. Sâhib-i arzuhâl Ali derûn-ı arzuhâlde mezkûrü’l-ism Ahmed mahzarında Emin Nureddin Mahallesi’nde gallesi imâm olanlara meşrûta zikri âtî vakf menzilin mutasarrıfesi olup bundan akdem vefât eden Meryem nâm hatun nısf-ı şâyi‘ini bundan akdem yüz guruş bedel-i makbûz mukābelesinde işbu hâzır bi’l-meclis mütevellî-i vakf olan es-Seyyid Ahmed Efendi izin ve ma‘rifeti ile bana ferağ ve kasr-ı yed eylemişiken bi’l-cümle menzil-i mezbûru mezbûr Ahmed bi-gayr-ı hakkın tasarruf eder deyü da‘vâ eyledikde ol dahi cevâbında mezbûre Meryem Hatun müdde‘î-i mezbûr Ali ile hayâtında bin yüz otuz sekiz senesinde İstanbul kādısı olan imâm-ı şehriyârî Abdurrahman Efendi huzûrunda nısf-ı menzil-i mezbûru vefâen ferağ ve kasr-ı yed etmişidim deyü da‘vâ ve ber-vech-i muharrer menzil-i mezbûrun nısfını vefâ tarîkı ile ferağ ve kasr-ı yed eylediği nümâyân oldukdan sonra bedel-i mezbûr yüz guruşu müdde‘î-i mezbûr Ali’ye ba‘de’t-teslîm mezbûre Meryem menzil-i mezbûru târih-i i‘lâmdan dört sene mukaddem beş yüz guruş bedel mukābelesinde bâ-ma‘rifet-i mütevellî bana ferağ ve kasr-ı yed eylemişidi deyü mazmûnu min-külli’l-vücûh takrîrine mutâbık kādı-ı mûmâ-ileyh Abdurrahman Efendi’nin hatmiyle mahtûm bir kıt‘a i‘lâm ibrâz eyledikde müdde‘î-i mezbûr mazmûn i‘lâm-ı mezbûru ikrâr u i‘tirâf etmeğin mûcebince müdde‘î-i mezbûr bî-vech mu‘ârazadan <> men‘ olunduğu huzûr-ı âlîlerine i‘lâm olundu. Fî 11 Rebî‘ülâhir sene [1]143.