Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 460 Hüküm no: 512 Orijinal metin no: [110a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuloğlanları başına terazibaşı iken bu görevden alınan el-Hâc Mustafa’ya yapılan muamelenin zulüm olduğu Ma‘rûz. Derûn-ı derkenârda mezkûrü’l-ism el-Hâc Mustafa İstanbul dekâkînlerinden yevmiye yedi bin beş yüz elli akçe mîrî tahsîl eden on beş nefer kuloğlanları üzerlerine otuz seneden berü bâ-berât-ı âlîşân terâzübaşıları olup vezîr-i sâbık İbrahim Paşa zamânında ecânibden Ahmed b. Receb mutasarrıf olduğu yevmî otuz dokuz akçe ulûfesin hazîne-mânde ve mukābelesinde zikrolunan terâzübâşılık kendiye tevcîh olunup lâkin mezbûr Ahmed emr-i mezkûrda râcil olmağla mukāta‘a-i mezbûrenin nizâmı muhtel ve müşevveş olduğuna binâen merkūm el-Hâc Mustafa ile merkūm Ahmed Dîvân-ı âlî’de derkenârda zikrolunduğu vech üzere bi’d-defa‘ât murâfa‘adan sonra vezîr-i mezbûr zikrolunan otuz dokuz akçenin on dokuz akçesini ref‘ ve mâ‘adâ yirmi akçesini kendi mâlından ver deyü cebr ve mezbûr el-Hâc Mustafa’ya zulm-i sarîh olduğunu cemm-i gafîr Müslimîn ihbâr etmeleriyle bu misillü mezâlim bi’l-cümle ref‘ olunmak bâbında hâlâ sâdır olan fermân-ı celîlü’ş-şânları mantûkunca bu muhdes-i mezbûr dahi ref‘ ve mahalli terkīn olunmak emr-i sevâb idiği bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 10 Rebî‘ülâhir sene [1]143.