Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 461 Hüküm no: 513 Orijinal metin no: [110b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas’a bağlı Zara köyündeki kilisenin tamiri bahanesiyle cebren aldığı parayı sahiplerine iadesi için Mehmed’e tenbih olunduğu Ma‘rûz. Ashâb-ı arzuhâl olan vilâyet-i Anadolu’da Sivasili kazâsında Zara nâm karye ahâlîsinden Gaspar ve Minas ve Markoz ve Magor ve Vartan ve Ferhad nâm zimmîler meclis-i şer‘de derûn-ı arzuhâlde mezkûrü’l-ism Mehmed mahzarında sekiz ay mukaddem mezbûr Mehmed vezîr-i sâbıkın câmeşûy ağası mütegallibeden Abdullah etbâ‘ından olmağla karyemizde vâki‘ kenîse için fermân-ı âlî ısdâr ve müceddeden ta‘mîr ettirdim deyü mahmiye-i İstanbul’da bizi zincir ve tomruk ile tahvîf ve husûs-ı mezbûru kendiden kat‘â iltimâsımız yoğiken bi-gayr-ı hakkın cebren iki bin guruşumuzu ahz etmekle hâlâ taleb ederiz deyü da‘vâ ve mezbûr Mehmed fi’l-vâki‘ husûs-ı mezbûr için meblağ-ı mezbûru karye-i mezbûr ahâlîsinden ismi ma‘lûmum olmayan âhar zimmîlerden ahz eyledim deyü ikrâr lâkin ber-vech-i müdde‘â müdde‘ûn-ı mezbûrûndan almadım deyü inkâr etmekle müdde‘ûn-ı mezbûrûndan müdde‘âlarını yedlerine verilen hüccetde tafsîl olunduğu üzere üç nefer şâhid-i udûl ile vech-i şer‘î üzere isbât etmeleriyle mûcebince edâsına tenbîh olunduğu huzûr-ı âlîlerine i‘lâm olundu. Fî 12 Rebî‘ülâhir sene [1]143.