|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 257 Hüküm no: 361 Orijinal metin no: [52b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Râbia bt. Ali’nin vefât eden kocası Bali’nin terekesinden kendi ve oğlunun hakkını tamamen aldığı
Husûs-ı âti’l-beyânın mahallinde tahrîri iltimâs olunmağın savb-ı şer‘den mevlânâ Hüseyin Efendi irsâl ol dahi zeyl-i [kitâbda] mastûrü’l-esâmî olan Müslimîn ile bundan akdem Bağdâd kādısı olan a‘lemü’l-ulemâi’l-mütebahhirîn fazîletli Vânî Mehmed Efendi hazretlerinin menzilinde akd-i meclis-i şer‘ ettikde mahmiye-i İstanbul’da Yazıcı Mahallesi’nde sâkine Râbia bt. Ali nâm hatun meclis-i mezbûrda işbu râfi‘u’l-kitâb Mustafa Çelebi b. Hasan mahzarında ikrâr-ı tâm ve takrîr-i kelâm edip bundan akdem vefât eden zevcim Bali ve oğlum Mehmed nâm müteveffâların terekelerine merkūm Mustafa Çelebi vâzı‘u’l-yed olmağın zevcim mezbûr Bali zimmetinde ma‘kūdün-aleyh olan iki yüz akçe mehr-i müeccelim ve sümün hisse-i şer‘iyyemi ve oğlum mezbûr Mehmed’in on bir bin sekiz yüz otuz yedi akçe muhallefâtından bana isâbet eden üç bin altı yüz on akçe hakkı merkūm Mustafa Çelebi yedinden tamamen ahz u kabz edip zimmetini ibrâ-i âmm-ı kātı‘u’n-nizâ‘ ile ibrâ ve ıskāt-ı tâm râfi‘u’l-hisâ ile ıskāt eyledim, ba‘de’l-yevm husûs-ı mezbûra müte‘allik merkūm Mustafa Çelebi ile da‘vâ ve nizâ‘ım kalmadı dedikde gıbbe’t-tasdîk haber vermeğin mâ-hüve’l-vâki‘ bi’t-taleb ketb ü sebt olundu.
Fi’l-yevmi’r-râbi‘ ve’l-ışrîn min-Cemâziyelâhire li-sene erba‘a ve sittin ve elf.
Şuhûdü’l-hâl: Fahrü’l-mevâli’l-kirâm Mehmed Efendi hazretleri eş-şehîr Vânî, fahrü’l-müderrisîn Abdurrahman Efendi eş-şehîr Câmi‘, fahrü’l-kudât Yusuf Efendi, Abdurrahman Efendi el-müderris, Abdülcelil Efendi el-müderris, Ahmed Beşe kethüdâ, İbrahim Beşe çukadâr ve gayruhum.
|