.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 258
Hüküm no: 362
Orijinal metin no: [53a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefât eden Süleyman Ağa’nın muhallefatından borçları ödendikten sonra geri kalan paranın vârislerine verildiği

Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi hadâik-i sultânîden hasbağçeye varılıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘ eylediklerinde fi’l-asl vilâyet-i Rumeli’nde Mostar kazâsına tâbi‘ Çarniçe nâm karyeden olup mahmiye-i İstanbul’da Bostancı Ali Ağa Mahallesi’nde mütemekkin iken bundan akdem vefât eden merhûm Süleyman Ağa b. Ali Ağa b. Memi b. Hasan nâm müteveffânın mezbûr Hasan ile li-ebeveyn karnıdaşlar olan Bali’nin sulbî oğlu olup usûbet-i nesebiye cihetinden müteveffâ-i mezbûrun hasran vârisi olduğu bi’l-fi‘l kazâ-i mezbûrda kādı olan mevlânâ Yusuf Efendi b. Hüseyin kıbelinden Abdullah Ağa b. Mehmed yediyle vârid olup imzâsıyla mümzâ ve hatemi ile mahtûm târîh-i kitâb sene Rebî‘ülâhirinin evâhiri ile müverraha hüccet verdi hasm-ı münkir mahzarında Yusuf b. Osman ve Ömer b. Veli şehâdetleri ile sâbit olan kitâb-ı nakli ile müsbit olan karye-i mezbûrede sâkin <> Mehmed Çelebi tarafından müteveffâ-i mezbûr muhallefâtına vâzı‘u’l-yed olanlardan ahz u kabz ve kendüye îsâle ve lede’l-hükkâmi’l-kirâm kabz [ve] îsâle mütevakkıf olan umûra vekîl olduğu kitâb-ı <> mezkûrede mastûr olan mezbûr Abdullah Ağa meclis-i mezbûrda işbu bâ‘isü’l-kitâb hâlâ korucu halîfesi olan fahrü’l-emâsil ve’l-akrân el-Hâc Mustafa Ağa b. Durak mahzarında ikrâr-ı tâm ve takrîr-i kelâm edip müşârun-ileyh el-Hâc Mustafa Ağa’dan müteveffâ-i mezbûrun akrabâsından olmağla kendi vâris olmak zu‘mu ile muhallefâtına vâzı‘u’l-yed olup kassâm-ı askerî defteri mûcebince muhallefâtının kıymetleri olan yetmiş beş akçeye ve Gökçegöz Mustafa Paşa zimmetinde olup bi’l-fi‘il Menteşe serdârı olan Mumcu Ahmed Çelebi yedinde olan yüz elli bin akçe ki cem‘an yüz seksen yedi bin yüz doksan beş akçe makbûzu olmağile meblağ-ı mezbûru merkūm el-Hâc Mustafa Ağa’dan vekâletim hasebiyle taleb eylediğimde mezbûr el-Hâc Mustafa Ağa müteveffâ-i mezbûrun ol mikdâr akçe muhallefâtına vâzı‘u’l-yed eylediğini ikrâr edip lâkin meblağ-ı mezbûrdan müteveffâ-i mezbûrun techîz ve tekfîni için iki bin beş yüz akçe ve muhallefâtı beytülmâl emîninden tahlîs için sekiz bin akçe ve resm-i kısmet için dört bin akçe harc ve sarf eyledim ve bâkī kalan yüz altmış altı bin altı yüz doksan beş akçeden dahi müteveffâ-i mezbûrun ahırında? samancı olan ( ) nâm kimesneye olan üç bin beş yüz akçe ve Gömlekçi Ahmed Beşe’ye olan yedi bin beş yüz akçe ve seksen beşinci cemâ‘atinden İsmail odabaşıya kırk altı bin sekiz yüz akçe ve kırk sekizinci odabaşısı Hasan Beşe dokuz bin akçe ve kethüdâsı Süleyman Ağa’ya beş bin iki yüz altmış beş akçe ve Mehmed Ağa’ya altı bin akçe ve Osman nâm kimesneye olan yedi bin akçe ve Gümülcineli Abdurrahman Ağa’ya olan on dört bin akçe ve Receb Bey’e olan beş bin akçe ve Süleyman Paşa silâhdârı babası Ahmed’e dört bin dört yüz akçe terzileri olana altı bin sekiz yüz seksen akçe ve Süleyman Ağa’nın hizmetkârı Mehmed’e olan dört bin iki yüz akçe ve katırcılara olan dört bin dört yüz akçe ki cem‘an yüz otuz üç bin dokuzar yüz kırk beş akçe düyûn-ı müteferrikasını ashâbına ba‘de’s-sübûti’ş-şer‘î ve’t-tahlîf-i mer‘î emr-i şer‘le edâ ve îfâ eyledim deyip mazmûnu takrîrine muvâfık herbirisini nâtıka temessükât ızhâr edip ancak yedimde otuz iki bin yedi yüz elli akçe bâkī kaldı deyicek ben dahi vekâletim hasebiyle merkūm el-Hâc Mustafa Ağa’nın cemî‘-i tasarrufatını tecvîz edip benden bâkī kalan otuz iki bin yedi yüz elli akçeden kitâb-ı nakilde olan mezbûrân yol şâhidlerine üç bin akçe verip bâkī yirmi dokuz bin yedi yüz altı akçeyi vekîl-i mezbûr Mehmed Çelebi’ye îsâl etmek için yedinden ben ahz u kabz edip mûmâ-ileyh el-Hâc Mustafa Ağa’nın müteveffâ-i mezbûr Süleyman Ağa’nın kassâm defterinde dâhil ve hâric olan kalîl ü kesîr, celîl ü hakīr ism-i mâl ıtlâk olunur muhallefâtına müte‘allık cemî‘-i da‘vâ ve mutâlebât ve eymân ve muhâsamâtdan zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, ba‘de’l-yevm mazmûn-ı kitâba muhâlif müvekkil-i mezbûrdan ve merkūm el-Hâc Mustafa Ağa üzerine bir tarîk ile da‘vâ sudûr ederse lede’l-hükkâmi’l-kirâm istimâ‘ olunmaya dedikde gıbbe’t-tasdîkı’ş-şer‘î vicâhen vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb ü sebt olundu.

Fi’l-yevmi’s-sâlis ve’l-ışrîn min-Cemâziyelâhire li-sene erba‘a ve sittin ve elf.

Şuhûdü’l-hâl: [53b] Umdetü’l-emâcid ve’l-ekârim Mehmed Ağa -zîde kadruhu-, fahrü’l-emâcid ve’l-a‘yân Hacı İbrahim Ağa -zîde kadruhu-, mefharü’l-eşbâh Muharrem b. İshak Bey el-cündî, Hasan Ağa b. Hüseyin, Muharrem Bey ...? bârgircibaşı, Avcıbaşı Süleyman Bey b. Ali, Hasan Bey b. Mehmed Efendi, Ahmed Bey b. Mehmed el-yesârî, <> Darbhâne bekçibaşı, Ömer Bey b. Kurd Ali el-bostânî, Hasan Bey el-cündî, Selim Bey el-bostanî Yusuf, Ali Bey b. Mehmed el-bostanî, Haseki Kasım Bey -zîde kadruhu-, el-Hâc Abdi b. Hızır, el-Hâc Yusuf b. Sinan, Ali Beşe b. Muharrem, Ali Çelebi b. el-merhûm eş-Şeyh Zülfikār ve gayruhum mine’l-huzzâr.