.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 259
Hüküm no: 363
Orijinal metin no: [53b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Beşe’nin evini sattığı

Mahmiye-i İstanbul’da Hızır Bey Mahallesi’nde sâkin Mustafa Beşe b. Abdullah nâm [kimesne] meclis-i şer‘-i hatîr-i lâzımü’t-tevkīrde işbu râfi‘u’l-kitâb el-Hâc Mahmud b. Ali mahzarında ikrâr-ı tâm ve takrîr-i kelâm edip silk-i mülkümde muntazam olup mahalle-i mezbûrede vâki‘ bir tarafdan Terzi Mehmed mülkü ve bir tarafdan İbrahim b. İsmail mülkü ve iki tarafdan tarîk-i âm ile mahdûd birbirine munfasıl iki bâb fevkānî odaları ve tahta-pûşu ve bir bâb tahtânî odayı ve bi’r-i mâ ve kenîfi müştemil olan menzilimi cümle levâhıkıyla iki yüz elli üç riyâlî guruş-ı kebîre mezbûr el-Hâc Mahmud’a tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûr iki yüz elli üç riyâlî guruşu yedinden tamamen ahz u kabz edip min-ba‘d menzil-i mahdûd-ı mezkûrede alâka ve medhalim kalmayıp mezbûr el-Hâc Mahmud’un mülk-i müşterâsıdır, keyfe mâ yeşâ’ mutasarrıf olsun dedikde mukırr-ı mezbûru kelimât-ı meşrûhasında merkūm el-Hâc Mahmud vicâhen tasdîk ve şifâhen tahkīk edicek mâ-hüve’l-vâki‘ bi’t-taleb [ketb] olundu.

Fi’l-yevmi’s-sâmin ve’l-ışrîn min-Cemâziyelâhire sene 1064.

Şuhûdü’l-hâl: Mehmed Efendi b. Ali el-imâm, Ramazan Efendi b. Şa‘ban el-müderris, Hüseyin Çelebi b. ( ) el-müezzin, Musa Çelebi el-kayyım, Mehmed b. Mustafa, İbrahim b. Reis Ali, Resül b. Ramazan, Mehmed Çelebi b. Ramazan, Osman Reis, Mehmed b. Abdullah, Mehmed b. Mustafa.