Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 468 Hüküm no: 529 Orijinal metin no: [112a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Kaliçeci Hasan Vakfı’na ait demirci dükkanının tasarrufu davasında haksız olduğu Ma‘rûz. Derûn-ı arzuhâlde mezkûretü’l-ism Âişe Hatun meclis-i şer‘de Kaliçeci Hasan Vakfı’ndan Parmakkapı kurbünde vâki‘ bir buçuk demirci dükkânına bi’l-icâreteyn vâzı‘u’l-yed olan karındaşı müteveffâ Mehmed’in oğlu sâhib-i arzuhâl Mustafa mahzarında vakf-ı mezbûr mütevellîsi hâzır olduğu hâlde zikrolunan bir buçuk demirci dükkânı tasarrufumda iken mezbûr Mustafa bi-gayr-ı hakkın tasarruf eder hâlâ taleb ederim deyü da‘vâ ve mezbûr Mustafa cevâbında mezbûra Âişe zikrolunan bir buçuk dükkânı elli guruş bedel mukābelesinde babam müteveffâ-i mezbûr hayâtında ol dahi vâlidem Fâtıma Hatun’a yine hayâtında bâ-ma‘rifet-i mütevellî ferağ edip vâlidem mezbûre vefât etmekle bana intikāl etmeğin bi-hakkın vaz‘-ı yed ederim hattâ mezbûre Âişe husûs-ı mezkûru birkaç def‘a benden da‘vâ ve on yedi guruş bedel-i makbûza yedime ibrâ hücceti vermişidi deyü mazmûnu min-külli’l-vücûh takrîrine muvâfık iki kıt‘a i‘lâm ve bir kıt‘a hüccet ibrâz edicek mezbûre Âişe inkâr etmeğin mezbûr Mustafa mazmûn-ı hüccet-i mezkûreyi muvâcehesinde şuhûd-ı udûlden el-Hâc Süleyman ve Berber Ahmed Çelebi b. Mustafa ile isbât etmeğin mûcebince mezbûre Âişe bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 18 Rebî‘ülâhir sene [1]143.