Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 469 Hüküm no: 530 Orijinal metin no: [112a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kedegralı Mehmed’in davası için yeni şahit talebi Ma‘rûz. Vilâyet-i Anadolu’da Amasya sancağında vâki‘ Kedegra kasabası ahâlîsinden sâhib-i arzuhâl Mehmed hasmı derûn-ı arzuhâlde mezkûrü’l-ism es-Seyyid Yahya Efendi mahzarında târih-i i‘lâmdan üç sene mukaddem mezbûr es-Seyyid Yahya Efendi mârru’z-zikr Kedegra kasabasında hâkimü’ş-şer‘ olmağla bi-gayr-ı vech-i şer‘î beni habs ve cebren beş yüz guruşum ahz etmişdir deyü da‘vâ eyledikde ol dahi inkâr etmeğin müdde‘î-i mezbûr müdde‘âsını isbât için ikāmet eylediği Molla Ahmed b. Mehmed ve Musa b. Mehmed nâm kimesneleri ba‘de edâ’i’ş-şehâde tezkiye için kıbel-i şer‘den Mevlânâ Mehmed Efendi b. Nurullah irsâl olunup sâkin oldukları Molla Fenarî Mahallesi ve Bitpazarı ahâlîsinden müseccelü’l-esâmî on beş nefer Müslimînden suâl eyledikde adl ve makbûlü’ş-şehâde olmadıkları bi’l-muvâcehe ihbâr etmeleriyle şâhidân-ı mezbûrân şehâdetlerinde mecrûhlar olmağla müdde‘î-i mezbûr müdde‘âsına şâhid-i adl ikāmetine havâle olunmuşdur. Fermân hazret-i veliyyü’l-emrindir. Fî 20 Rebî‘ülâhir sene [1]143.